Referandûm qedîya la derheqê netîceyê referandûmî de munaqeşeyî hîna domîyenî. Referandûmî ra dima 2 rojî verê Kombîyayîşê Heyetê Wezîran virazîya û kombîyayîş de rewşa îstîsnayî (OHAL) seba 3 aşman ame dergkerdiş. Goreyê ci do Tirkîya 3 aşman bi OHAL bêro îdarekerdiş. Bi no hawa OHAL reya 3. ame dergkerdiş.Rojnameger û nuştoxî Celal Başlangiç, Fatîh Polat û Umît Kivançî derheqê xebatê referandûm û dergkerdişê OHALî de qisey kerdî.
Îdareyo kêfî
Derhênerê Pêroyî yê Rojnameyê Evrenselî Fatîh Polatî va ‘OHALo ke bin nameyê vera teşebusê derbe de ame îlankerdiş, nika bîyo haletêk yê zext û tedayan’ û wina domna: “No OHAL nameyê îdareyo keyfin o. Vatênê ma do referandûmî ra ver OHAL wedarnî, labelê nika referandûm de bi hawayo şikin ya vejîya û dima ra OHAL reyna ame dergkerdiş. No zî nîşanê ma dano ke hukmat îdareyo keyfin de israr keno. Eynî wextî de no nîşanê ma dano ke hukmat ancax bi zext û tedayan estena xo paweno.”
Ganî merdim vera bêhuqûqî sere nêrono
Polatî dewamê qiseykerdişê xo de bale ant têkoşîno ke bêro dayîş ser û wina dewam kerd: “Merdim ancax bi têkoşînêko bihêz eşkeno vera îdareyo ke meşrû nîyo de bivinderî. Demokrasîya ke bi hawayo xurt ameya qezençkerdiş de qeraranê keyfinan rê ca çin o. Cok ra ganî merdim vera na bêhuqûqî de sere nêrono.”
Do bidomîyo
Rojnameger Başlangiçî zî va ‘dergkerdişê OHALî nîşanê ma dano ke se beno wa bibo, AKP do welat bê OHALî nêşêno îdare bikero’ û wina domna: “Wexto ke AKP ame îqtîdar propagandaya ‘OHAL çîyêko baş nîyo’ kerdêne, her çiqas ke AKP bi xo OHALan nêwedarna zî sey ke yê wedarnayo, hereket kerdêne. Labelê ewro nuqtaya ke ameyî de 81 bajaran de OHAL esto. Seba ke AKP nêşêno bê OHAL estena xo bidomno, nîyetê ci esto ke heta weçînayîşê 2019 OHALî derg bikero. Tirkîya nika rewşêka krîtîke de ya. Her çiqas ke hende neheqîyî estî û netîceyê referandûmî bişik bibo zî AKP nêşêno welat bi hawayo asan îdare bikero. Heta ke pêrodayîşî çinêbî, AKP nêşêno welat îdare bikero. Goreyê mi îqtîdar do estena xo zaf nêdomno.”
Nîno wedarnayîş
Nuştox Umît Kivançî zî dîyar kerd ke ‘OHAL nika ra pey rewa rewe nêwedarîyeno’ û wina dewam kerd: “Xora îdareyo ke yeno waştiş zî çîyêko winasî yo. Wina aseno ke OHAL do tim bidomîyo û rewa rewe zî nêro wedarnayîş. Merdim nêşêno seba nika ra peyî çîyêk vajo. Wina aseno ke do welat de çîyê xêrin nêbî. Beno ke tayê kesê ke îtîraz bikerî, estbî.”
DÎHABER/STENBOL