Demîrtaş'î vist vîrî ke Erdogan û AKP hekîm û sawcîyan girotê bin qontrolî û aşkere kerd ke bi raya înan dawayan akenê. Wazenê sahaya siyasetî dîzayn bikerê. Coka wazenê qedexeyê siyasetî bidê ma.

Hemserokê HDP  eleqe ant hetkarînê AKP û MHP ser û vat: “Hinî AKP û MHP zey jû partî xeftîyenê. Munaqeşeyê derheqê sîstemê serokîn de zî, peynîyê hetkarînê lîmin ê pey perdeyano. Çiyê ke Erdogan û AKP fikirîyena bîyaro, demokrasî nîya, dîktatorîn û faşîzma.

Wazenê destanê HDP bişikînê

Demîrtaş'î persa weçînayişê rew-wextî ser o zî wina va: “Erdogan û AKP anketan virazenê. Wazenê HDP binê dêsî de biternê û 400 wekîlan bifînê dest. La belê nika rayê HDP se ra % 11 aysenê. Coka Erdogan û AKP nika pawenê û hedreyinan kenê.  Eke anketan de bivînê ke HDP binê bendî de aysena, hema qerarê weçînayişî danê.” Demîrtaş’î operasyonanê qirkerdişê siyasî zî zey leteyê hedreyinê weçînayişan hesibna û va: “Coka wazenê dest û linganê HDP bişikinê. Her roj operasyonanê qirkerdişê siyasî virazenê. La belê heme embazanê ma bigirê zî, HDP do raya xo de şiro.” Demîrtaş'î ard ziwan ke CHP zî xizmetkarînê siyasetê Erdogan û AKP kena û bi nayî ra zî sûcê gird kerdo û kesê wayirê wîjdan ê CHPyijan ra wast ke, vera siyasetê partiya xo vengê xo vejê û bloqê demokrasî miyan de ca bigirê.

Tirkîye Musil de kerd vinî

Hemserokê HDP Selahattîn Demîrtaş'î operasyonê Musil ser o zî qisey kerd û vist vîrî ke Tirkîye firsed pawena. Demîrtaşî va, ‘bi sebebê korîna siyasî ê Ahmet Davutoglu û wastenê şexsî ê Tayîp Erdogan'î, verî operasyonê Musil dest bikero ci, Tirkîye kerd vinî.’ Demîrtaş'î dîyar kerd ke eke Tirkîye hurendîya DAIŞ, Nûsra û OSO de, bi kurdan ra îtîfaq bikerdbîya, do ser bikewtbîya. La belê Erdogan û Davutoglu, şî Nursa, DAIŞ û OSO tercîx kerd û cok ra zî kerd vinî.

Tenya yew planê ma esto o zî xoverdayiş o

Demîrtaş'î îdîayê zey AKP vera PKK planê 5 madeyin kerdo hedre ser ozî wina vat: “Biyarê xo vîrî, par Davutoglu vat ‘PKK aşma kanûn de qedîyena’, dima vat ‘çile de qedîyena’ nêbi vejîya vat, ‘PKK do Newroz de nêmano.’ Se bi? O bi xo qedîya. Nika mayê vera Newrozê 2017 şinê. Nika ancî plananê pûç kenê hedre û ancî şarî pa meşgûl kenê. Erdogan û AKP bi na zîhniyetî, 5 nê, planê 5 hezar xalî zî hedre bikerê, ser nêkewnê. Se  kenê wa bikirê, kamcî planan kenê hedre wa bikerê, ê ma tenîya jew planê ma ê A esto. O zî xoverdayiş o. Heme planê înanê vardiyê xoverdayişê ma. Mayê heme ca vera faşîzmî xo ver bidê.  


 DÎHA / ENQERA