Wazenî 1915î dibare bikerî

Vera hêrişê dagîrkerîye yê artêşa Tirkî û çeteyanê ci de xoverdayîşê Hêzê Sûrîyeya Demokratîke (QSD) bêmabên dewam keno. Tabûrê Armenîyan zî hetê QSDyî de ca gêno û endamanê taburî dîyar kerd ke ê do pîya biresî serkewtişî.

Tabûr nameyê xo Fermandarê TKP/ML TÎKKO Nûbar Ozanyano (Orhan Bakirciyan) vera DAÎŞî de şehîd bibi ra girewto û ser nameyê tabûrî Masîs Otanyafî qisey kerd û dîyar kerd ke erdê Vakur û Rojhelatê Sûrîye qetlîyam reyde têrî yî. Otanyafî va ‘artêşa Tirkî bi hawayo xedar hêriş kena’ û wina dewam kerd: “Tirkîya dewamê dewleta Osmanîyan a û wazena qezencanê Kurdan çin bikera.”

Otanyafî va ‘ma verê cû zî bîyî şahidê hêrişanê winasîyan’ û wina dewam kerd: “1915 de mîlyonêk û nîm Armenîyî ameybî qetilkerdene. Wazenî tarîx bidî dibarekerdene. Nika zî seba Vakur û Rojhelatê Sûrîye eynî çîyan bikerî. Dinya vera nê hêrişan de bêveng a. Şorişê Rojawanî şorişê ma yo. No şoriş yê Kurd, Ereb, Armenî, Tirkmen û Suryanîyan o. Ewro roja bêvengîye nîya. Ma vera nêyî de payan ser o yî. Ma do pîya têkoşîn bidî û serbikewî.”