SEMRA TURAN / MA / DÊRSIM
Gomê Laşikî yê dewa Agaçpinarî ya pabesteya qezaya Pulurî ya Dêrsimî, serra 1993î de hetê leşkeran ra ame veşnayene û dewe bi zorî ameye vengkerdene. Bi desan keyeyê ke mecbûr mendî gomê xo ra vejîyê, şîyî şaristananê rojawanê Tirkîya.
Tayê keyeyê ke paweyê netîceyê muracatê fermî yê, wazenê ke selahîyetdarî wezîfeyê xo bica bîyarê. Keyeyî vanê eke ê sazîyanê fermîyan ra cewabêkê negatîfî bigêrê, ê do dewa ke tede bîyê meyman ra agêrê Kocaelî û Bûrsa, labelê hetêna ra ê do seba agêrayîşê dewa xo têkoşînê xo bidomnê.
Hasan Sakîno (63) ke Kocaelî ra ameyo, dîyar kerd ke yew keynaya ci astengdar a û merkezanê şaristanan de bi serran sey mehkûman ciwîyayo û wina domna: “Bi serran o ke ma dewa xo rê hesret mende. Maya mi Fatma hesreta wareyî ra kanser bîye û merde. Ma nêeşkayî cenazeya aye zî bîyarê dewe. Waştişê aye yo tekane agêrayîşê dewe bi. Mengêk o ma keyeyê yewna kesî de manenê. Ma wareyê xo de sey multecîyan ê. Hendî wa no hal biqedîyo.“
Şukru Koçerî da zanayene pêvînayîşanê ke înan walî û qeymeqamî dir kerdo, înan de ameyo vatene ke serranê 2014 û 2015î de destekê înan ê seba agêrayîşê dewe ameyo birnayene û hendî do destek nêro dayene. Koçerî wina domna: “1993 de dewa ma, keyeyê ma ameyî veşnayene û ma bi zorî ameyî koçkerdene. Ma seba ke hesreta ma ya serran biqedîyo agêrayî.”