Akademîsyene Nurîye Gulmene û Mamosta Semîh Ozakça bi Qerarnameyê Hukmê Qanûnî (KHK) de karî ra ameybî îxraçkerdiş. Her di perwerdekarî zî seba ke tepîya biagêrî karê xo grevê vêşanî daybî destpêkerdiş.
Roja 76. ya grevê vêşanîye de her di perwerdekarî zî ameybî tewqîfkerdiş û nika çalakîya înan roja 218. de dewam kena. Seke yeno zanayîş 14ê êlule de mehkemeya înan estbî û 2 rojî mehkeme ra ver, Gulmene bi zorî erşawîyaybî Nêweşxaneyê Numune. Nika zî ame musayîş ke Gulmene roja 9ê Teşrîna verêne de erşawîyaya koguşê mehkuman yê Nêweşxaneyê Numune.
Babete ser o avûkate Aytul Kaplane qisey kerde û vera na rewşe de reaksîyon nîşan daye. Kaplane va ‘ti kesî xebere nêdaya avûkate û miqatekerdoxan û Gulmene berdî koguşê mehkuman’ û wina dewam kerde: “Mi zanayêne ke ê Nurîye berdî serwîsa lezgîne. Ewja de tena seba 5 deqayan destûr dayî.”
Vatî ‘lazimî bi miqatekerdoxî çin a’
Kaplane dewamê qiseykerdişê xo de va ‘ma verê va qey seba miqatekerdoxî berdî koguşê mehkuman’ û wina domnaye: “Çimkî raporê Mehkemeya Heqê Merdiman ya Ewropa zî estbî. Labelê wexto ke ma serdoktorê nêweşxaneyî reyde pêvînayîş kerd, eyî ma ra va ‘Lazimî bi miqatekerdoxî çin a; eke lazimî bibo, ma eşkenî newe ra rapor amade bikerî.’ Ma raporê Nêweşxane û AÎHMî nîşanê dozgerî da, labelê dozgerî red kerde.”
Nîşaneyê mudaxaleyî yî
Kaplane dîyar kerde ke ê seba ke wazenî mudaxale bikerî, miqatekerdox qebul nêkenî û wina va: “Neke senî keso ke grev de yo rê lazimî bi miqatekerdoxî çin a. Eke miqatekerdox bibo, o wext çalakgerî ser hişê xo ra nêşonî. Ê wazenî bi mudaxaleyêkî çalakîye biqedênî. Nika odeyo ke Nurîye tede ya, zaf tarî yo û şewqê roje nêvîneno. Destûr nêdayî ke ez ode ra biewnîya. Xora ê Gulmene bi wesayîto tekerin ardî.”
Halê tîya zaf xirab o
Kaplane tewr peynî qiseykerdişê xo de qala pêvînayîşê xo yo bi Gulmene reyde kerde û wina va: “Nurîye vera pêvînayîşo ke 5 deqa ramit de îtîraz kerde. Nurîye zî sey mi fikirîyaya. Wexto ke înan aye ardo koguşê mehkûman, vato qey miqatekerdox anî. Nurîye va; mi ra vatî ‘ma xebere daya dayîka to’ labelê ez serê sibayî ra paweyê miqatekerdoxî ya’. Nurîye wazenî wa problemê miqatekerdoxî çareser bibo. Nurîye mi ra va ‘tîya zaf tarî yo, qet roşn nêbeno, ez hêrsin a’.”
‘Rûmetê merdimîye do zorê îşkenceyî bîşêro’
Heto bîn ra çalakîya ke Caddeyê Yukselî de seba piştîdayîşê Nurîye Gulmene û Semîh Ozakçayî yena viraştiş zî roja 338. de dewam kena. Sey her reyan na rey zî çalakgerî Ziqaqê Konurî de ameyî têhet û waştî îzehet bidî çapemenîye. Labelê polîsan mudaxaleyê çalakgeran kerd û çalakgerî tepiştî. Kesê ke ameyî tepiştiş bi sloganê ‘rûmetê merdimîye do zorê îşkence bîşêro’. Çalakîye de tewr kêmî 3 kesî ameyî tepiştiş. Çalakîye bi çepikan piştîdayîşê welatîyan peynî bîye.
MA/ANQARA