BÊRÎTAN SARYA/ANF/ŞEHBA
Dewleta tirk 2011 ra nata Sûrîye de şerê xo ser esasê dişmenîya kurdan de meşnena û 24ê tebaxa 2016î ra nata zî tena bi çeteyan nê, bi xo zî beşdarê şerî bena. Dagîrkerîya ke Cerablus de dest pêkerde, dima ra ver bi Exterîn, Raî, Marê, Ezaz û Babî de vila bîye. Nika zî hedefê dewleta tirkî de destronayîşê Idlibo ke seba Şehba û Efrînî zaf muhîm o, esto.
Babete ser o Fermandarê Pêroyî yê Hêzanê Şorişgeran Haci Ehmedî qisey kerd.
Fermandar Haci Ehmedî va ‘seba ke muhîmîya stratejîke ya Idlibî esta, Idlib hedef de yo’ û wina domna: “Wazenî Idlib de Heyet Tahrîr El Şamî bixeniqnîy. Rusan nêyî pêşnîyaz kerd û Îranî zî qebul kerd. Çimkî ê baş zanî ke eke Idlib wina bimano, do hêzê HSD û Hêzê Şorişgerî mudaxaleyê ewja bikerî. Bi no hawa wazenî vernîya mudaxaleyê bigîrî. Dewleta tirk hewl daye sey Estora Truva Idlibî zereyî ra fetih bikera; cok ra çeteyanê xo viste dewre û hewl daye zere ra bida piro. Labelê El Nusraye nêyî ferq kerd û mudaxale kerde û heme grûbanê bînan tasfîye kerde. Nurettîn Zengîyî ant hetê xo, çimkî Zengî rêxistina Îhvani Muslumî ya. Na grûbe ver bi Tahrîr El Şamî nêşona, çimkî teslîmê tirkan bîya.”
Îttîfaqî veng î
Haci Ehmedî va ‘tîya de tirkî wazenî ser Zengî ra, rejîm zî hewl dano Zengîyî bianco hetê xo’ û wina dewam kerd: “Bi no hawa wazenî zere ra bidî Heyet Tahrîr El Şamî ro; çimkî teber ra pirodayîş zehmetin o. Çimkî hetê leşkerî de girewtişê bajarêkî zaf zehmetin o. Eke tirkî DAIŞî reyde peymane nêviraştêne, nêşînayêne tîya bigîrî. Yanî heme hêzê xo zî biantêne Şehba, reyna nêşînayêne. Idlib zî wina yo. Cok ra nika wazenî Zengî bigîrî. Labelê heta ke Cephet El Nusra bihêz bo, nê îttîfaqî veng î. Idlib seba Şehba zaf muhîm o. Çîyê ke ewja de bibîy, ser Şehba de zî tesîr kenî.”