Qezaya Cizîrî ya Şirnexî de mabênê 12ê kanûna 2015î û 2ê Adara 2016î de qedexeyê tebervejîyayîşî ameybî îlankerdiş. 12 kesê ke cêrzemînan de birîndar bîy û ambulanse teber de paweyê înan bîy, ameybî qetilkerdiş. Heta nika derheqê cenazeyê nê 12 kesan de ti malumat nêameyo girewtiş.
Cenazeyê Ferîde Yildiz, Sakîne Durmîş, Mardîn Çelebî, Hacer Aslan, Osman Gokhan, Huseyîn Dervîşî, Servet Aslan, Serdar Pîşkîn, Îdrîs Susîn, Alî Aslan, Cemal Purlek ve Emrah Aşkanê ke wexto ke cêrzemînan de bîy, beşdarê televîzyonî bîbî û paweyê rizgarbîyayîşî bî, heta nika her çiqas ke keyeyê înan hende muracat kerdî zî nêameyî dîyayîş. Keyeyê ke bi waştişnameyan muracatê Serdozgerîya Komare ya Cizîrî kerdbîy, 2 serrî yo ti cewab nêgirewtî.
Cenazeyî mîyanê molozan de yê
Keyeyî fikirîyenî ke cenazeyê domananê înan cayê ke awanîyê TOKÎ ser de ameyî viraştiş, mîyanê molozan de bibî. Badê ke hewteyêk verê cenazeyêk ewja de ame dîyayîş, keyeyan reyna muracat kerd. Keyeyî muracatê xo de waştî ke wa viraştişê awanîyanê TOKÎyan bêro vindarnayîş û cenazeyî bêrî gêrayîş. Dozgerî hîna cewab nêdayo înan û xebata ke seba awanîyê TOKÎ ameybî destpêkerdiş, dewam kena. Dayîka Hacer Aslane, Hezne Aslane va ‘tena waştişêkê mi esto, o zî wa mezelêkê yê kênaya mi bibo’ û wina dewam kerde: “Ez wazena kerrayêka mezelî ya mi biba û ez bişînba biberma. Ez wazena wa cenazeya kênaya mi bivînî.”
DÎHABER/ŞIRNEX