DÎREN YURTSEVER / MA / ANQARA
Wezîrîya Karê Zereyî 259 muxtarî bi mehneyê terorî wezîfe ra girewtî. Zafaneyê nê muxtaran bajaranê kurdan de wezîfe kerdêne. Herçiqas ke derheqê nê muxtaran de qerarêko huqûqî çinêbo zî, muxtarî hetê Wezîrîye ra kar ra ameyî girewtene.
Babete ser o Hetkara Hemserekîya HDPyî ya Berpirsîyarê Îdareyê Herêmî Yurdusev Ozsokmenlere qisey kerde. Ozsokmenlere va ‘ganî derheqê muxtaran de qerarê mehkeme bibîyêne’ û wina dewam kerde. “Eke qerarê mehkeme bibîyêne, xora muxtarîya înan xo bi xo betal bîyêne. Nika dîyar nîyo ke do herinda înan de kesê bînî bêrî tayîn kerdene an nê.”
Ozsokmenlere dîyar kerde ke sebebê wezîfe ra girîyayîşê muxtaran rejîmê yew kesî yo û wina domna: “Serekkomar muxtaran tim tim Qesra xo de ano têhet û înan de qisey keno. Dima ra şêwirmend û Serekkomarî tena zî înan de qisey kerdênê. Armancê qiseykerdişî o bi ke muxtaran bikerî merdimê xo. Muxtarê demokrat, welatperwer û rêzdarî qet beşdarê na polîtîka nêbîyî. Cok ra nê muxtarî wezîfe ra ameyî girewtene. Wazenî muxtaran bikerî ajan. Muxtarê ke nêyî qebul nêkenî, benî hedefê Qesre û Wezîrîya Karê Zereyî.”
Ozsokmenlere peynîya qiseykerdişê xo de va ‘ganî no het de herkes hesas bibo’ û wina qedênaye: “Wina aseno ke AKP wazeno ke muxtar û şaredarîyan bi tehdîdî asteng bikero. Ma do nê hesabanê înan veng bivejî. Ma do ewro ra tedbîranê xo bigîrî.”