Iyê ki hetanî a saet ray nêday, hinî nêşenê welatê tede ronişenê raya xo bidê. Teniya keverê sînor ê Tirkiye de şenê ray bidê.
***
Coka enê 2 rojê peyinî, qandê weçînayoxanê teverê Tirkiye, zaf zaf muhîmê. Bi taybetî jî qandê ma kurdistanij û çoşmanê demokratîk ê Tirkiye. Çimki %90 ra vêşiyê ma, bi mecbûrî vejiyaymi teverê welatî. Ma mecbûrê ameyin mendîmi. Zafê ma, zilm û zordarînê dewleta tirk ser amey xerîbîni. Hewna bi hezaran kesê, nêşenê şirê welat. Zaf kesî estê, bi desan seriyo may û piyê xo, way û birayê xo nêdiyê.
***
Wexto ki ma enê hetî ra biewnê, weçînayin qandê ma firsedo. Ma bi enê weçînayina şenê raya welatî akerê. Ma şenê, hesabê zilm û zehmetîni pêrin pers bikirê. Ma şenê, bi rayanê xo raya welatiya piya, raya demokrasî û azadî ê qandê heme şaran û baweriyanê Tirkiye akirê. Firsedê winayin fina siftayino kewno destê ma.
**
Ma biyê ûmûdê qandê serkewtinê HDP. Çimê pêrino ma sero. Raya serkewtinê HDP, ma ra ravêrena. HDP hedef kerdo welatanê Ewrupa de, 400 hezar rayan bigiro. Ma şenê bi rayanê xoya, bendê weçînayinî birijinê, xeyalê Erdogan’î pûç vejê û hesabanê lîmin ê AKP bixeripinê. Bi ê rayana xoya verniyê AKP û DAIŞ bigirê.
***
Qandê nay jî 2 rojê ma mendî. Ewrupa de hewna, bi se hezaran kesê nêşiyê sandiqan ser estê. Teniya 2 rojî mendî. Firsedo remeno. Nêşiyayinê sandiqan ser, teniya ray nêdayin niyo. Eynî wext de, xizmetkarînê AKP û DAIŞ o. Ha nêşiyê sandiqan ser û ha şiyê raya xo dayo AKP, maben de qe ferq çiniyo. Eki AKP bi ser bikewo, aya dişmenîna kurdan û destegê qandê DAIŞ bikiro vêşî. Zilm û zordarînê hetanî nikay, qat bi qat vêşî bikiro. Coka şiyayinê sandiqan ser û raydayinê HDP, rijinayinê bend û dêsano. Girotinê verniyê AKP û DAIŞ o. Serkewtinê HDP, binkewtinê AKP û çeteyanê DAIŞ o. Coka lazimo qe jew weçînayoxê kurd û demokrat ê Tirkiyijê ray nêdayo HDP memano. Bi enê fikra çi karê ci esto virado û hetanî 31”ê gulan raya xo bido HDP.
Memed DREWŞ