Şaredarîyê ke hetê AKPyî ra ameyî xespkerdene ra yewe zî Şaredarîya Bajarê Girdî ya Wanî ya. Vera tayînbîyayîşî de wanijî vernîya qayûman de hêrsin î û reaksîyon nîşan danî. Serekê Komeleya Heqanê Merdiman yê Wanî Mûrat Meletî derheqê xespkerdişê şaredarîyan de da zanayene ke bizanayîş, plankerde şaredarîyê Amed, Wan û Mêrdînî ameyî xespkerdene.
Meletî qayûm sey hêrişkerdişê bawerîya demokrasî hesibna û wina va: “Ganî vera derbeya qayûmî de her kes o ke demokrasî ra bawerîya ci esta tewirêko hempar têbigêro. Zîhîyeto ke ewro qayûm eşt şaredarîyan, beno ke siba Meclîsê Tirkîya zî betal bikero. Tirkîya de tena bi aştîye heme meseleyî eşkenê bêrê çareserkerdene.”
Meletî dewamê qiseykerdişê xo de qala mesajê Rayberê Şarê Kurdî Abdullah Ocalanî kerd û wina va: “Vengdayîşê Birêz Ocalanî seba şarî bi omidê aştîye. La ca de dimayê nê vengdayîşî qayûmî ameyî tayînkerdene û vernîya naye ameye girewtene. Ganî îqtîdaro sîyasal bizano ke tena aştîyêka bianore nê welatî de heme probleman çareser kena. Xora verê cû zî Kurdîstan de polîtîkaya qayûmî ameye caardene la ma peynîya naye 31ê Adare de dî. Ganî na polîtîkaya hêrişkare ca de bêro caverdayene, qayûmî biteriknî û hemserekî agêrê karê xo ser.”
WAN