Heme televîzyonanê dewlete û bê îstîsneyan heme televîzyonanê taybetan propagandaya hukmatê AKP rê xizmet kerdnê. Serekwezîr Ahmet Dawutoglu, endamê hukmat, serekê şaredarîyan û wekîlê AKP adeta seferber bîybê, şew û roj televîzyonan de propagandaya AKP kerdnê. Yewna het ra şaristan bi şaritan geyraynê mîtîngî organîze kerdnê.

Yewna het ra serekkomar Recep Tayyîp Erdoganî, bêterafeya xo ra fek verrada bi, meydan-meydan, televîzyon bi televîzyon geyranî, kombîyayîş bi kombîyayîş ser o organîze kerdnî û propagandaya AKP kerdnî. Hem AKP û serekkomar Erdoganî; propagandaya xo de, HDP tehdît kerdnî. Terorîstey ra sucdar kerdnê. Bi eşkara se partîyêka îllegal û dişmen îlan kerdnê. 

 Yewna het ra, şaristan û qezayî tanqan, topan û tifigan fekanaynê. Vejîyayîşê kuçan qedexe kerdbi. No proses de bi desan sîvîlî qetl kerdê. ‘Mintiqayê (heremê) qedexeyî’, ‘Mintiqayê (heremê) asayîşî’ ameyê îlankardiş. 


Çi destê înan ra ame kerd!

Şaristanan û qazayan de, hemşaredar û endamê meclîsanê şaredarîyan tede bi hezaran aktîvîstê HDP, DBP û sazî û dezgeyan debîyê zîndanan. Buroyê weçînayîş û bînayê HDP raştê hêrişanê faşîzan ameyê. Adeta waştnê ke, heme îdareker, xebatkar û aktîvîstanê HDP, xebata weçînayîşê ra derkenar bikê. AKP û Serekkomar Tayyîp Erdoganî, semedo ke vengê HDPyîjan bibirnê û HDP binê bendê weçînayîşî de vîyardê, çi destê înan ra ame kerd. 

Yewna het ra çeteyê DAIŞe, mûseletê HDP kerdê. Hukmatê AKP, hetê asayîşî de gureyê xo nêkerd. Weçînayîşê 7’ê Hezîran ra ver Mersîn û Edene de, bînaya HDP de bombeyî dayê teqnayîş. DAIŞe, 5’ê Hezîrana 2015’î de mîtîngê Amedî de, di hebî bombayê dayê teqnayîş. Panc hebê merdimî qetlkerdê û 402 tenê zî bîrîndar kerdê. 

25’ê Hezîrane de Pirsûs de bi hêrişê bombaya DAIŞe de 32 akîvîstê aşîtî û demokrasî şehît kewtê, 100 tenan vêşêr bîrîndar kerdê. Enqere de, 10’ê Citmenge de, terorîstan bi di bombayan 102 aktîvîstê demokrasî û aşîtî qetl kerdê, 400 tenan vêşêr zî bîrîndar kerdê. Hukmatê AKP, gureyê xo nêkerdo, sîyasetkar û aktîvîstê HDP û demokratî, vera DAIŞe û faşîstanê sîvîlan nêpawitê. Hem serekkomar Recep Erdoganî hem zî serekwezîr Ahmet Dawutogluyî vat ke; “Qetlîamê Enqere, yew çalekîya qokteyl a.” Hetta Wezîrê Daristan û yê Awe yo verînî Weysel Eroglûyî zî vatnî ke; “Hem Amedî de û hem zî ê Enqere de HDP bomba daya teqnayîş.” Heme kes zano ke PKK, no qetlîamî DAIŞe kerdî. Gelo bêkemaqilan, kam no vatişê şima înan keno? Şima hem wezfeyê xo nêkerdo û şima nê aktîvîstê aşîtî nêpawitê, hem zî şima HDP no qetlîam ra sucdar kenê. Şima semedo ke bêrê îqtîdar, şima heme çîy xo rê rewa veynenê. Zaf heyf! Sewîyeya sîyasetê şima zî orte de ya. 


Ser o tam yew ambargo ronabi

HDP, yew partîya sîyasî ya. Yew sîyeseto demokratîk kena. Şima çende polîtîkaya şerî de israr kenê HDP tersê ey aşî û demokrasî de israr kena. Ganî hukmatê AKP, hemserek, îdareker aktîvîstê HDP, DBP vera çeteyanê DAIŞe bipawitnê, tersê ey şima bi terz û uslûbê xo se hedef nawitê. Medyaya dewlete zî weşananê xo de, vera HDP yew polîtîkayêka şovenîzm û faşîzane pratîze kerde. Telewîzyonanê dewlete zî HDP ser o tam yew ambargo ronabi. 

Semedo ke weçînayîşê 1’ê Teşrîne, bêqeza û bêbela vêro, KCK yew het ra bo zî vengê çekan birnabi. Prosesê weçînayîşî de, ganî hukmatê AKP zî vengê çekan bibirnaynî. Çi heyf ke hukmatê AKP no dem de, şer hina gir kerd. Bellî yo AKP zî sey Tansû çîllere şer de israr kena. Tansû Çillere zî vatnî; “Ya qedînê, ya qedînê,” 

AKP zî polîtîkaya kiştişî de, şerî de israr kena. Semedo ke hina vêşê cenazeyê ciwananê kurdan û tirkan bêrê, koyî, zozanê û goristanî yenê bombardimankerdiş. Na bes nîya kurdanê Rojawanî zî bombardiman kenê. Kurdî Rojawanê wazenê ke binê dewleta Sûrîye de, welatê xo de, xo bi xo, xo îdare bikê. Kurdê vakurî zî wazenê ke binê dewleta Tirkîya de, xo bi xo, xo îdare bikê. Kurdî, Tirkîya de demokrasî wazenê, heq, edalet wezenê. Yewna dewletêka cîya nêwazenê. 


Ferqê şima û Tansû Çîller û Kenan Ewrenî çî yo?

Eke şima de yew kompleks û yew nêweşîya nîjadpereste çin a se, şima çirê kurdan ra endi nefret kenê? Eke şima de yew nêweşîya kîbîr û îqtîdarî çin a se, şima çirê dîyalog û muzakereyan ra remenê? Eke şima na mesele de ceng de israr bikê, ferqê şima û Tansû Çiller û Kenan Ewrenî çî yo? Ma bi xo esla şer nêwazenê, la eke şima şer de israr kenê se, verê lajanê xo raykê cephe. Eke şima pey lajanê şarî, no ceng de israr kenê, na yew bêehlaqîye ya.

AKP na atmosfera ceng û şîdetî ra yew pêla şovenîzmî awan kerde. AKP na pêla şovenîzmî ra îstîfade kerd û rayê xo vêşê kerdê. Goreyê ma, no weçînayîş; weçînayîşêko demokratîk nîyo. AKP se ra se rayan bigêro sebeno? Kenan Ewrenî zî yew pêla şovenîzmî ra se ra neway vêşêr rayî girewtbî. Yew wext Kenan Ewrenî zî xo se qralî Tirkîya dîynî, la wexto ke merd, yewer nêşi mezelê ey ser. 


Hinê tercîh ê şima yo


Şima zaf waştnê ke, tena bêrê îqtîdar. Şima seya çekan de, bi zor û bi polîkaya şer û şîdetî zî bibo şima ameyê îqtîdar. Şima hinê resayê mûradê xo. Dormareyê Tirkîya de tam yew qaos esto. Bêrê fek na polîtîkaya şerî ra verradê. Her ciwan yew may, pîy û qewmê ey esto. Şaqşaqçîyê şima, şima ra raşteya nê şarî nêvanê. Raşta ey, şima çendi merdiman kişenê, şima endi na mesela grîft bena. Heyf o, wa hinê gonîya ciwanan billa nêbo. Eke şima samîmîbê, na mesele zaf asan çareser bena. Hinê tercîh ê şima yo.


MAMOSTE SILÊMAN