Rojhilatê Miyanî onca gîrîno. “Wisarê Ereban” bî bela serê Ereban. Tunus ra dest kerd ci, Lîbya, Misir û Suriye ser bî vila. Tabî wayîranê “Wisarê Ereban” desture nêdê ke no “Wisar” dugelanê Ereban yê bînan de kî vila bo. Dugelanê jê Qatar û Suudî Erebîstanî na “Wisar” ra bara xo nêgurete, çike dugelanê Nato nêwast. Hora dugelanê Nato bi destê nî hurd dugelan û Tirkiye Rojhîlatê Miyanî fîşt hurê, nika dûr ra dûr tey niyadanê.

Tunus de se beno, Lîbya de kam kamî kiseno, Suriye de çond sey hezar însanî amê qetil kerdene, bîrûbazarê dugelanê Nato de niyo. Nika kî onca Iraq kewt têwerte. Çete-dewletan rêxistinê jê El Nusra û Dewleta Iraq-Şam yê Îslamî kerdî weyiye verdayî ra werte. Bi taybet çete-dewletan jê Tirkiye, Qatar û Suudî Erebîstan poştî dê garana qetilkaran jê El Nusra û Dewleta Iraq-Şam yê Îslamî, hona kî danê ci.
Bi yardimê Nato, Tirkiye, Qatar û Suudî Erebîstan, Dewleta Iraq-Şam yê Îslamî biye quwetin. Verecoy Rojava de kurdî qirkerdî û taye heremê Suriye fîşt ra xo dest. Dima, na rêxistina îslamiya terorîste sukanê Iraq Ramadî û Feluce de wiste ra pay, nî sukan de taye heremî guretî binê bandira xo. Naca ra kewte raye amê, bêveng û bêvaz Musul de vejiye. Dima hetê Kîrkuk ser kewte raye. Hen oseno ke na garana qetilkaran çim verdo heremanê Başurê Kurdîstanî. Rojava de verva kurdan sernêkewte, nika Başurê Kurdîstanî xorê kerdo hedef.
Îta de jûyena kurdan zaf zaf mûhîm a. Na rîwal ra azayê konseyê raye ra berdene yê KCK, Murat Karayilan, heşto peyen derheqê biyayîsanê peyenen yê hetê Iraq û Başurê Kurdîstanî de jû eskerakerdîs da. Eskerakerdîs de niya vajiya: “Welat û milet bêwayîr niyê, kurdî gune quweta xo jûkerê. Gerîllayê PKK naye rê amadeyê.” Tabî naye avê kî eskerakerdîsê niyanenî bîbî. La hata ewro hetê siyasetê Başur ra cevabê na eskerakerdîsî nêame dayene. Peyniye de Başurê Kurdîstanî kî barê na bêvengiye onceno.
1992 ra na het Başur de taye heremî kurdan dest derê. La partiyanê Başurê Kurdîstanî ora na het kî, hewl nêda ke heremanê bînan yê kurdan kî bicerê xo dest. Mesela Kîrkuk halnêkerde, her tim hebena peyser este. Teyna heremêke dest derê, î mavênê xo de kerdî bare. Yê partiyanî Başurî qisaweta xo yê Kurdîstanî çîna. Vîzîyonê xo yê jûbiyayena netevê kurd çîno. Jûyena netevî ra remenê. Tarîx ra honde lona derjenî derse nêgureta.  Rêxistinê kurdanê Bakurî jê PKK vanê: “Welat û milet bêwayîr niyê!” Partiyê Başurê Kurdîstanî vanê “Perê petrolî bêwayîr niyê!” Eke partiyanê Başurî no vinetîsê xo nêvurna û hetê jûyena kurdan ser game nêeste, pêro kurdî kenê vîndî, pêro kurdî dezê na rike oncenê.