Bi seyan ciwanê Girkê Legê beşdarê meşîyayîşê ke çarçeweya hemleya ‘welat welatê ma yo, heyfgirewtiş sozê ma yo’ de ame viraştiş, bîyî. Ciwanan meşîyayîşo meşaleyîn de azadîya Ocalanî waştî û tecrîdî şermizar kerdî. Meşîyayîş de çalakvanan pankart akerdî û posterê Rayberê Şarê Kurd Abdullah Ocalanî kiriştî. Ciwanî Rasteyê Şehîd Xebatî yê Girkê Legî de ameyî têhet û rêzgirewtişêk ra dima dest bi mêşîyayîşî kerdî.
Dima ra çalakîye de Endamê Îdarekarîya Yewîya Ciwanê Rojawanî Hawar Şêrawayî qisey kerd. Şêrawayî va ‘ciwanî heme dinya ra vanî, ê do heta azadîya Rayberîya xo têkoşînê xo bidomnî’. Şêrawayî veng da heme ciwanan ke wa beşdarê hemle bibî. Meş bi govend û siloganan qedîya.
Ma azadîya Ocalanî wazenî
Heto bîn ra bi seyan kesê ke Til Koçer û dewê dormeyê ci de ronîşenî zî seba azadîya Rayberê Şarê Kurdî Abdullah Ocalanî çalakî organîze kerdî. Çalakî Merkezê Perwerdeyî yê Til Koçerî de dest pêkerde û çalakî de siloganê ‘Ma azadî wazenî, aştîye ra hes kenî û azadîya Rayber Apo wazenî’ ameyî eştiş. Çalakgerî nîmeyê bajarî de vindetî û deqayêk rêz girewtî. Dima ra hem serekê Meclîsê Herêma Til Koçerî Newaf Xededanî qisey kerd û wina va: “Ma seba heme şaranê bindestan meşîyenî. Meş seba rûmetî yo û ma azadîya Ocalanî wazenî.”
Reyna Îdareya Kongreya Starî ra Emel Celûde qisey kerde û wina va: “Ocalanî bi fikirê xo dinya roşn kerd. Ewro saya fikrê ci de şarî pîya cuyenî. Ma azadîya cinîye de rolê Rayber Apoyî xo vîra nêkenî.” Çalakî bi siloganê ‘Bicuyî Rayber Apo’ qedîyaye.
ANF/GIRKÊ LEGÊ