Heftek verêcu, Roşanê Ziwanê Kurdî bi. Tayê cayan de, vengek zaf xurt nêvejîya. Cayê kî, zafer Kurdê Zaza ciwîyenî, nayê cayan de wayîr vejîyayîşê ziwan zayîf bi. Nê cayan de, kaykerdişê kemalîstê netewperest ze CHP û kemalîstê kewe ze AKP û Fetullahîyan zêdeya.

 CHP, AKP û Fetullahî, bi taybetî, ser Dêrsîm û Çewlîg kaykenî. Seba nê çîyê, Zanîngeha Tuncelî û Bîngol ameyê wazîfedarkerdiş. Seba nê çîyê, sermayê ca kenî. Gore zîhnîyetê xo, sermayedar virazenî. Şarê Kurd şalnenê,  bi na şalneyîş sermaye kom kenî. Sermaye ya kî kom kerda, bi na sermaye zengînê xo virazenê.  Şîrketan awan kenî. Rêxistinê sermayedaran virazenê. Bi nê çîyan zî, kewnê mîyanê Şarê ma ê Çewlîg û Dêrsîm û yew bi yew  şarê ma xapînenî.
Bi name dîn,bi name wendiş, bi name hetkarî keynê ma,xortê ma, dayîyê ma benî, musnenî Tirkî, eslê xo ra dur visnenî.
Hina kenê kî, zerrê Şarê Kurd yê Kird-Zaza,Kirmanc, Dimilî- de tayê kesan kenî hetkarê xo. Dima ra zî, hêdî  hêdî kenî ze Tirk. Hina bena kî, xo ra şerm kenî û vanî ma Tirkî.
Seba nê çîyê, bi taybet Cemaatê Fetullahîyan-Kemalîstê Kewe ê Newe- tewir tewir karan kenî. En zaf zî, ser Çewlîg kar kenî. La Şarê Çewlîg ê Kurdê Zazayan kewnî nê torê Fetullahîyan.
Wexto ke Tirkperestê Laîk ze CHP û MHP yenî Çewlîg, vanî; “Şarê Çewlîg qehremano”!
Wexto ke Tirkperestê Faşo ê Kewe ze AKP û Fetullahî zî yenî Çewlîg,vanî;”Şarê Çewlîg qehremano”!
Binê nê qisê de hina kenê kî, Şarê Çewlîg wayîrê Kurditîyê xo ê Zaza nîvejî û destêk bi do dewlet û Tirkperestîya Faşîst.
Nika-eka- zî seba Tirkkerdişê Şarê Çewlîg, Cemaatê Fetullahîyan kaye xirab û lîşin kenî. Cemaatê Fetullahîyan plan kerda kî, 11ê Hezîranê 2013 de  zerrê Çewlîg de Olîmpîyatê Ziwanê Tirkî virazo.
Seba nê çîyê, sermayedarê Fetullahî Medenî Arîfoxlu, Şaredar Serdar Atalay, Rektorê Zanîngeha Bingol Giyasettîn Baydaş û Walî pîya serwerî kenî.
Cemaatê Fetullahî, bi nê karî wazeno kî, Şarê Çewlîg ê Kurdê Zazayan qirbikero û bikero merkezê Tirkperestî.
Cemaat plan kerda kî, bajarê cîran ê Çewlîg, Dêrsîm, Mûş, Bedlîs û Xarpet ra zî însanan kom bikero û biyaro Çewlîg. Hedefê Cemaatî de komkerdişê 30 hezar kes esto. Cemaat hina keno kî, ser Çewlîg tesîrê xo zêde bikero.
Planê Cemaatê Fetullahîyan hina yo.
Bajarê Çewlîg ê Kurdê Zazayan de no kar, karekî qirkerdişo. Bajarê Çewlîg ê Kurdê Zazayan de,  Olîmpîyatê Tirkî viraştiş yeno çi mane?
Cemaatê Fetullahî  û AKP qijanê Şarê Çewlîg genî, înan ra Tirkî danî musnayîş, kenî Tirk û serda zî Olîmpîyatê Tirkî virazenê û ze averşayîşê kî danî nişandayîş
La hina bena?
Nika Cemaatê kî Îsraîl wurzo, zerrê Filîstîn de, qijanê-tut- Filîstîn,bi ziwanî Îbranî perwerde bikero, înan bikero cihu-yahudî- û ser ra zî Olîmpîyatê Ziwanê Îbranî virazenê.
Şarê Filîstîn, nê çîyan qebûl keno?
Mumkunî nê çîyê Filîstîn de esta?
Eger Filîstîn de mumkunî nê çîye nîbena, seyî Kurdîstan de bi taybet Bajarê Çewlîg ê Kurdê Zazayan de bena?
Şarê Çewlîg seyî nê çîyê qebul keno!
La hina bena?
Şaredar, Rektor, Sermayedar û Walî serwerîyê nê karî kenî. La ver nê qirkerdişê yew veng nîvejîyeno.
La hina bena?
Nê çîyê seba Şarê Çewlîg şerm nîyo?
Şerm nîyo?