Taxê Alîpaşa û Lalebeyî yê qezaya Sûrî ya Amedî de bin nameyê ‘Vurîyayîşê bajarvanî’ de rijnayîş dewam keno û heta nika beşêka hîra ya taxan ameyo rijnayîş. Nika zî wazenî keyeyê ke wayîrê înan nêdayo zî birijnî.
Taxê ke bi barîyer, hêzê polîs û TOMAyan ameyî padayîş û cereyan û awa şarî ameya birnayîş de şar hîna zî xover dano û fek keyeyanê xo ra veranêdano.
Bi nameyê Ayşan Duna ke wextê qetilbîyayîşê Serekê Baroya Amedî yo kehen Tahîr Elçîyî de keyeyê aye amebî rijnayîş û nika taxa Alîpaşa de cuyena, vera rijnayîşan de reaksîyon nîşan daye.
Ayşan Dune va ‘seba ke keyeyê mi hetê polîsan ra amebî rijnayîş, ez nika Alîpaşa de cuyena’ û wina dewam kerde: “Polîsan verê dormeyê keyeyê mi girewtî û ma ra vatî ‘keye ra bivejyî’. Ma zî qebul nêkerd. Lajê mi vejîya banî ser û nêverda ke keyeyê ma birijnî. Labelê înan lajê mi tepişt û ez nêzana berî kura. Ma taxijan reyde şîyî Komeleya Heqê Merdiman (ÎHD) û ma waşt ke wa heqê ma bipersî. ÎHDyî nameyê ma ser ro muracatê Mehkemeya Heqê Merdiman ya Ewropa (AÎHM) kerd, labelê heta nika cewabêk nêameyo dayîş.”
JINNEWS /AMED