Qezaya Amed Licê de Wesayîta zirxî cinîya bi nameyê Pakîze Hazar kişt.
Hazar a kokim ke waşt ravêro ohetê rayî, wesayîta zirxî ya leşkerî pakewte û cinîya kokim cayê bîyayîş de weşîya xo kerd vinî. Wesayîta zirxî ca de cayê bîyayîş ra şî. Cenazeyê cinîya îxtiyar seba otopsî wedarîya nêweşxaneyê Dewlet yê Weqfa Halîs Toprak ê Licê.
Wesayîtanê zirxî xêlê kesan kişt
Lejker û polîsanê Tirk xêlê reyî bi wesayîtanê zirxî xeylê kesan kiştî.
* 6’ê Îlona 2016’î de Meydanê Seyîd Riza yê merkezê Dersim de, wesayîta zirxî ya bi tîpa Kobra yê polîsan ginaye Nacîye Ozdemîr a 71 serrî piro û aye qetil kerd.
* 9’ê Sibata 2017’î de, qezayê Kerboran yê Mêrdîn de, Berfîn Dîlek a 7 serrî ke dibistan ra şî keye, wesayîta zirxî yê polîsan pakewte û weşîya xo kerd vinî.
* Kuçeyê Gevran ê Amedî de, 27'ê Nîsana 2017’î de, wesayîta zirxî ginaye Hatûn Elhûman a 55 serrî piro û Elhûman weşîya xo kerd vinî.
* 28'ê Nîsana 2017’î de, Wan de wesayîta zirxî yê polîsan pakewte Samî Ûçan. Ûçan ke hewadîya nêweşxane weşîya xo kerd vinî. Wan de mîyanê hefteyekî de wesayîtê zirxî pakewte 7 kesan û înan dirbetin kerd.
* Tewr peynî de şewa 4'ê Gulana 2017’î de qezaya Sîlopya yê Şirnex de, wesayîteke zirxî kewt keyeyêkî mîyan û domanê binameyê Fûrkan û Mûhammed Yildirim ê ke birayê pê bî qetil kerd.
DÎHABER/AMED