Cenîyê êzidî yê ke 3ê Tebaxa 2014î de raştê hêrîşanê qirkerdişî yê DAIŞ ameybî, xo rêxistin kerdî û nika zî hadreyînê operasyonê xelesnayişê Mûsilî kenê. Fermandara Yekîneyên Jinên Şengalê (YJŞ) Zeynep Hebabî dîyar kerd ke iyê dê seba heyfgirotişê cenîyê ke hetê çeteyanê DAIŞ hêsîr amey girotiş tewrê operasyonî bibê. Hebabî vist vîrî ke qe yew quwet nêşkeno vernîya tewrbîyayişê operasyonî yê înan bigîro.
Hebabî hayr ant xo rêxistinkerdişê cenîyanê Şengalî ser û wina va: “YJŞ ser bingehê rêxistinkerdişê cenîyanê êzidî û heyfgirotişê bi hezaran dayik û cenîyê êzidî yê ke hesîr kewtî destê çeteyan xo tenzîm kerdo. Cenîyanê êzidî verra hêrîşan rayîrê xoverdayişî weçînayo. Nayî ra zî ma zey YJŞ hadreyê ke her cayekê cenîyê êzidî amey remnayen û amey rotiş de herb bikerê û heyfê înan bigîrê.”
‘Nêşkenê vernîya ma bigîrê’
Fermandara YJŞ Hebabî vist vîrî ke perasyonê xelesnayişê Mûsil seba înan zaf muhîm o û aşkere kerd ke wexto ke ê behsa Mûsilî kenê tenya zey cayekê nêhesibenê. Hebabî ard zon ke Şengal zî girêdayê Mûsilî yo û va, ‘nayî ra zî ma zey YJŞ hadre yê ke dew û komelgehanê Şengal yê ke mendî bixelesnê.’ Zeyneb Hebabî hayr ant quwetê ke wazenê vernîya YJŞ de bibê manî ser û va ma nê manîkerdişan nêsilasnenê, qerarê tewbîyayişê operasyonî de bi israr ê. Qe yew quwet nêşkeno vernîya ma bigîro. Hebabî da zonayen ke ê her çî ra hadreyê ke heta çilka peynî yê gonîya xo lej bikerê, may û wayanê xo bixelesnê.
‘Ganî şar yewitîya xo rono’
Hebabî vist vîrî ke pêrokîn quwetê şoreşger şenê poştdayişî bidê YBŞ û YJŞ û tewrê operasyonî bibê. Fermandara YJŞ Hebabî herzewbîn veng da şarê Şengal ke her yewerê ci tifing hewado û tewrê na hemle bibê. Hebabî hayr ant cenîyanê êzidî ke amey remnayiş ser û aşkere kerd ke Şengal ra heta sûka Mûsil cenîyê êzidî bazaran de amey rotiş û bi nê vatenan qiseyanê xo qedîna: “Seba nayî hewce yo her êzidîyek xo mesûl bivîno. Ser na esasî vengdayişê ma pêrokîn şarê ma ra no yo ke bibê yew û yewitîya xo ronê û bêveng nêmanê. Nayî ra nika wextê yewitî yo.
JINHA / ŞENGAL