Nebatê Kenger û qîbarî bi ameyîşê wisarî cayê xo dezgeyanê sûkan de girewtî. Seke yeno zanayene bi germbîyayîşê hewayî êdî koy û zozanan de nebatê ke wirîyenî, vejîyenî. Kenger û qîbar zî nê nebatan ra yê.
Zozanê ke Qezaya Derecîkî ya Colemêrgî ra girêdaye yî de nê her di nebatî vejîyayî. Nebatê ke hetê yenî arêdayene, bazaranê sûke yê Wanî de roşîyenî. Nînan ra kenger hema vaje her dezgeyî ser o esto û eleqeyêko pîl ci rê esto. Seke zanîyeno kenger telûyin o û mîyanê şarî de sey darûyê kanserî yeno zanayene. Kîloyê kengerî bazaran de bi 10 TLyî ra roşîyeno. Cinîya bi nameyê Sarya Işika ke seba herînayîşê kengerî şîya bazar, wina va: “Ma xeylê werdê kengerî virazenî. Ge sey cacix û selatayî mîyan de, ge zî ma hakan ser o şiknenî û arayî de wenî. Qîbar zî erzîyeno mîyanê keledoşî. Kenger seba loqle, gurçike û xeylê tewranê kanserî rê baş o û hema vaje her zozan de reseno. Cok ra şar zaf weno.”
JINNEWS / WAN