Kurdistan de badê zimistana çetin û bi ameyişê wesarî xoza renginî bena, dar û gulî zîl danê. Nîmetê xoza yê tewr erjaye zî tarê ciya ciya yê ke bi ameyişê wesarî ra resenê yê. Herema Qerejdax ke sînoranê qezaya Riha Sêwereg de ya de nika wextê kengeran o. Welatijan destpa arekerdişê kengeran kerd. Dewijî kengeran him zey şamî pewjenê û wenê, him zî roşenê û debara xo kenê.
Her derdî rê derman o
Kengero ke perê ci bi ameyinê wesarî ra piya pûr beno, kokê ci ra yeno vetiş. Herzewbîn rîwalê ke bi telî yo, arekerdişê ci zaf zehmet o û ked wazeno. Tayn dewijî kengerê ke are kerdî benê bazarî de bi bihayê ercan roşenê.
Taxa (mehla) Otlî ra ceniya bi nameyê Hatîce Yildiz vist vîrî ke bi ameyişê wesarî ra piya ê vejyenê mergan û kengerî are kenê û wina va: “Ez seatanê şodir de keye ra vejyena. Him çetin o, him zî kêf dano. Kenger biyo leteyê cuyê ma. Ma de biyo zey adet. Tamê ci zî zaf weş o”.
Yildiz da zonayen ke Mêrdîn û Amed ra welatijî şinê Qerejdax de kengeran are kenê.
Sebebê kêmbiyişê kengeran
Apkeynaya Hatîce Hîvron Yildiz zî ard ziwan ke tamê kengerî zaf ciya yo û da zonayen ke veriya coy, her ca yê Qerejdax’î de kengerî resayî. La nika tenya tayn çayan de resenê. Hîvron Arekerdişê şaş, dermankerdiş û awkerdişê hêgayan zî sey sebebê kêmbiyayişê kengerî damusna.
Kurdistan ra heta Tirkiye eleqeyê gird vîneno
Tenya Kurdistan de nê, kenger herzewbîn metropolanê Tirkiye de zî raştê eleqeyê gird yeno. Kenger him firkî rê, mîgrenî rê, sîstemê hezmkerdişî rê derman o. Herzewbîn nêweşiyê tûreyî, damargiroteyî rê zî derman o û pakkerdişê gonî de rolekê gird kay keno. Kenger dezgehanê Îzmîr de zî ser dezgehan de yo.
Nûrî Dûdak ke Kurdistan ra Kenger berdo Kadîfekale ya Îzmîr aşkere keno ke, kurdê ke Kadîfekale de cuwyenê kulturê xo ra girêdayî yê. Dûdak’î da zonayen ke o Mêrdîn, Amed û sûkanê bîn ra mamulê zey tirşo, rib, ingurê wişk, rêwaz beno Îzmîr û eleqeyê gird vîneno.
Nûrî Dûdak ano ziwan ke, bi nay him eleqeyê înan bi Kurdistan nêbiryena, him zî ê berhemanê welatî ra feyde gênê.
DÎHA/RIHA/ÎZMÎR