Şaxa Ardimkerdişê Kalûpîran a ke girêdayîya Şaredarîya Bajarê Girdî ya Amedî ya û Serekîya Dayîreyê Xizmetanê Sosyalan ser o xebatan kena, semedo ke tecrube û zanayîşê kalûpîran neqlê ciwanan bikero ciwan û kalûpîran ana têhet. Ciwan û kalûpîrê ke verê cû xeylê wext ameyî têhet na rey zî wextê mehseran de ameyî têhet. Na aktîvîte taxa qezaya Erxenî Karpuzlu de ameye viraştiş. Ciwan û kalûpîran pîya awa engura ke rezî ra arêdaybî kerdî mîyanê lênan û adir ser o girêna. Dima ra engura ke ameye girînayîş çarşefe ser o ameye rakerdiş û dîya tîje ver. Ciwan û kalûpîran dima ra zî dendikê gozan kerdî layî û sawitê helawa germine ro.

‘Kalûpîr tecrubeyê xo pare kenê’
Mudirê Şaxa Ardimkerdişê Kalûpîran yê Serekîya Dayîreyê Xizmetanê Sosyalan Abdurrahman Karakoyunî îzah kerd ke, Şaxa Kalûpîran kena ke bi têhetardişê ciwan û kalûpîran kulturo verên neqlê neslanê neweyan bikera û wina va “Ma her tim winasî xebatan kenê û ma qayîlê wa kulturê ma vindî nêbo. Ma na rey zî wextê mehseran de ciwan û extîyarî ardî têhet. Ciwan û extîyaran pîya bastêq û sincoqo gozin viraşt.  Na aktîvîte de kalûpîran tecrubeyê xo ciwanan de pare kerd.  Bi no qayde mabênê kulturan da dayîşgirewtiş virazîya. Wexto ke ma ciwan û kalûpîran anê têhet ma wazenê wa ciwanî kalûpîran ra çîyêk bimusê.”

Karakoyînî îzah kerd ke, semedo ke wa ciwan û extîyarî bêrê têhet înan emser werdê fitarî  dayo, zebzeyî kerdî huşk û nika ra tepîya zî do xebatê înan dewam bikerê. Karakoyunî dewamê qiseykerdişê xo de da zanayîş ke, malzemeyê ke ameyî viraştiş îkramê kalûpîran benê û wina va “ Ma tayê mazlemeyan kenê huşk.  Wexto ke ma bastêq û sincoqî kerdî hazir ma do mîyanê kalûpîran de pare bikerê.”

AMED