Qezaya Cizîrî ya Şirnexî de 14ê kanûna 2015 de qedexeyê tebervejîyayîşê kuçeyan amebî îlankerdiş û qedexe 79 rojan dewam kerdbî. Keye, mal û milkê şarî zirar dî û şar mecbûr mendbî ke ca û warê xo biterikno. Şarê Cizîrî derheqê Wezaretîya Karê Zereyî de doza tazmînatî akerdbî.
Wezaretî pawitişêko ke 3 rîpelan ra pê yeno, erşawite mehkeme û pawitişê xo de dîyar kerda ke ti berpirsîyarîya ci zirarê madî û manevî yê rijîyayîşî Cizîrî de çin a. Wezaretîye pawitişê xo yo ecêb de vato ‘operasyon de sîlehê teknolojîk yê peyên û personelê ke bi hawayo baş ameyî perwerdekerdiş, ca girewtî’ û pawitiş wina dewam kerdo: “Eke wina nêbîyêne, hedîseyî nêameyêne kontrolkerdiş. Ziraro madî û manevî de ti qusûrê Wezaretîye çin o. Hêzê Asayîşî seba temînkerdişê ewleyî şarî, heme çî goreyê qanûnan kerdo.”
2700 keyeyî bi tanq û topan ameyî rijnayîş
Wezaretî hetê hêzê dewlete ra qetilbîyayîşê Ramazan înce û bebekê Mîrayî zî sey nîşaneyê girewtişê tedbîran nîşan daya. Bîlançoya ke Vezîra Bajarvanî û Dormeyî Fatma Guldemet Sariye aşkere kerdbî, eksê Wezaretîya Karê Zereyî de bî û bîlanço de vatbî 2700 keyeyî bi tanq û topan ameyî rijnayîş. Reyna goreyê wezaretî do seba newe ra awankerdişê taxanê Kuştepe, Cudî, Sur, Dag Kapi, Kale, Şah, Yafes, Alîbey û Nurî 3-4 mîlyar dolar pere şêro.
Bi hawayo lejkerî nusîyayo
Babete ser o Avûkate Newroz Uysale va ‘waştişnameyê pawitişî bi ziwanê leşkerî ameyo nuştiş’ û wina domnaye: “Waştişnameyî de qala teknolojîya peyêne û personelo tewr baş yeno kerdiş. No qebulkerdişêk bo daxî, raşteraşt çend personelî beşdar bîyî û sîlehê senîn ameyî xebetnayîş, nêameyo vatiş. Wezaretî wina vana ke sey ke vajo şima cuyenî û nêyî rê şukir bikerê û heto bîn ra mehkeme ra wazena ke wa sey dewlete qerarêk bido. Ma her çiqas ke raporanê tayê sazî û dezgehan pêşkêşî mehkem kerdo zî Wezaretî ti cewab nêdayo.”
DÎHABER/AMED