Fermandarê QSDyî Mazlûm Ebdîyî vera hêrişê dagîrkerîye ke 10 rojî yo dewam kenî de şervananê QSDyî silam kerd û da zanayene ke wezîfeyê înan pawitişê Rojawanî yo. Ebdîyî wina domna: “Vera artêşa Tirk û çeteyanê ci de xoverdayîşêko tarîxî dîyeno. Ez bawer kena cayo ke xoverdayîş esto do serkewtiş zî bibo.”
Fermandarê Hêzê Sûrîyeya Demokratîke (QSD) Mazlûm Ebdîyî qisey kerd û dîyar kerd ke amancê dewleta Tirkî pêroyê herême dagîrkerdiş o û ê tena bi xoverdayîşî eşkenî hêrişanê dagîrkerîye çin bikerê.
Fermandar Ebdîyî va ‘dewleta Tirkî û çeteyê aye bi hezaran leşkeran, bi tanq û teyarayan hêriş kenê’ û wina dewam kerd: “Bi taybetî Ezaz, Bab, Efrîn ra se hezaran ra zêdeyêr çeteyê DAÎŞ û El Nusra ardî. Heta nika şervananê ma dimayê xoverdayîşêko gird Girê Sipî ra tepîya agêrayî. Xoverdayîş Serêkanîyê de dewam keno.”
Ebdîyî dewamê qiseykerdişê xo de da zanayene ke îzehetê dewleta Tirkî ke vano ‘Ma Serêkanîyê girewta’ zûrî ya û wina va: “Ewja de xoverdayîşêko tarîxî dewam keno. Seba ke Serêkanîyê sînorê Tirkîya de ya, dewleta Tirkî bi heme hêzê xo hêrişê ci kena, têkoşîno ke vera ey de yeno kerdene, sey destanî yo. Rohelatê Girê Sipî erazîyêko veng o. Teyarayê şerî yê dewleta Tirkî bi tankan tîya ra kewtî rayîrê M4î. La seke çapemenîya înan îdîa kena, hende nêkewtê zereyî. Tayê dewî destê ma de yê, tayê dewî destê înan de yê. Rayêk waşt bêrê rayîr kontrol bikerê la ma da înan ro û ewja ra vetî. Wazenî nê rayîrî kontrol bikerê û ewja ra şêrê Kobanê. Vizêr şan dewleta Tirkî û çeteyanê aye waşt ke bikewî Minbic. Di baskan ra hêrişî kerdî. La dimayê cewabdayîşê hêzanê ma verê nê waştişê înan ameyî girewtene. Nika tîya de hêrişî ameyî vindarnayene.”
Ma vera hêrişanê DAÎŞî de xo pawenê
Ebdîyî qala pawitişê şarî kerde û wina va: “Ma verê cû zî vatbi ke eke dewleta Tirkî hêrişê ma bikera, têkoşînê vera DAÎŞî de seba ma beno meseleyo dîyin yan zî hîrêyin. Nika no tewir o. Êdî amancê ma yo verên no yo ke ma hêrişanê vera cografyaya xo vindarnê û nê dagîrkeran erdê xo ra vejê. Bêşik DAÎŞ seba şarê ma û merdimîye tehlûkeyêko gird o, la êdî seba ma meseleyê verên DAÎŞ nîyo. Çarçeweya têkoşînî yê vera DAÎŞî de îtîfaqê ma û Amerîka dewam keno. Nika nizdîyê 12 hezar DAÎŞijî û keyeyê înan estê. Raştîya xo de Amerîka wazena ke peymana vera DAÎŞî do dewam bikera. La wezîfeyê ma yo verên pawitişê Rojawanî yo. Nika ma vera hêrişanê DAÎŞî de xo pawenê. Çimkî ma zanenê ke dimayê hêrişanê Dewleta Tirkî DAÎŞ newe ra yeno xo ser û har bîyo. DAÎŞî zafê cayan de hêrişî kerdî.”
Ganî partîyê Kurdan gamanê pratîkan bierzî
Xora xoverdayîşê Rojawanî heme dinya de yeno zanayene. Ewro vera dagîrkerîye de heme dinya paştî dana Kurdan. Qet şik çin o ke xo ma rê sey deyndarî vînenê. Heme dostê ma vanê ke ê kişta ma de yê la nê razînêbîyayîşî nêvejenê. Hema hêrişê dagîrkerîye dewam kenê. Ganî partîyê Kurdan gamanê pratîkan bierzî. Dewleta Tirkî dişmenê ma hemeyan a. Tena wazena ke Kurdan çin bikero. Roje roja xoverdayîşî ya, tena bi kombîyayîş û îzehetan nêbeno. Ganî pratîk de veng bidîyo xoverdayîşê Kobanê, Serêkanîyê, Grê Spî û heme cayanê xoverdayîşî. Pêkerdişê ma ê Sûrîye hema tam nêameyo ca. Raşt o artêşa Sûrîye ameya Minbic û Til Temîr la pêkerdişê ma xeta ameyîşê înan ê xeta sînorî yo. Ez tîya ra heme şervananê YPG, YPJ û QSDyî û heme şarî ke ewja yê silam kena. Embazê ma xoverdayîşêko tarîxî danê. Bitaybetî zî embazê ke Serêkanîyê de şer kene, înan silam kena. 10 rojî yo ke vera teknîkê xurtî de xover danê. Ez bawer kena cayo ke xoverdayîş esto do serkewtiş zî bibo.”
MA / AMED