Na xebatî rê 3 milyon û 180 hezar lîre mesref şino. Heta nika dêsê aydê 7’in Fermandarîya Kolorduye10 metre tepîya ame antiş û dêso verên ame wedartiş. Asfalt ame viraştiş, leyekê newe ameyê ronayîş û dîrekê roşnîkerdişî ameyê montekerdiş. Cadeya Xarpetî verê cû 2 xet ameyîş, 2 xet zî şîyîş bi. No qeyde cade bi 3 xet ameyîş û 3 xet şîyîş. Xetêk zî semedê rayê pisqilêtî ame viraştiş. Xebatê cadeyî zî peynîya serre de qedîyeno.
‘Ma do zêde bikî’
Hetkarê Sekreterê Pêroyî yê Şaredariya Şaristano Gird a Amedî Abdullah Sevînç derheqê şîyîşê xebatan de malumat da û îzeh kerd ke xebatê ke mabênê Meydanê Şêx Seîd û Seyrantepeye de dewam kena qasê 3 kîlometre ya û wina vat: “Ma uca de Meydanê Şêx Seîdî ra heta Seyratepe 4 xet, Seyrantepe ra heta Meydanê Şêx Seîdî 3 xet rayîr virazenê. Ma xebatê peyzajî, rayê pisqilêtî û payarayan virazenê. Ma xaye kenê ke rayanê pisqilêtî bîşêrî teberê şaristanî. Ma wazenê sibaroj 80 kîlometre rayanê pisqilêtî bivirazî. Nika ê rayan ra yewêk cadeyê Xarpetî ser de yeno viraştiş.”
‘Sebebê ci DEDAŞ o’
Sevinç qalîkerdişê xo de bal ant ereymendişê xebatan û qalîkerdişê xo wina peynî kerd: “Semedê ke pergalê binerdî yê kabloyan ê DEDAŞe xebatê ma erey kewt. Hema zî xebatê DEDAŞe uca de dewam kenî. Eke DEDAŞ leze bido xebatanê xo, ma heta peynîya serre xebatê cadeyê Xarpetî qedînenî. Eke xebatê ma qedîya, trafîkê şaristanî de zî do rehetîyêk bivirazîyo.”
AMED