Sûka Minbic ya ke kewna Vakûrê Sûrîye 30 kîlometre rojawayê çemê Firatî de ya. 85 kîlometre dûrê Heleb, 45 kîlometre dûrê Cerablûs, 65 kîlometre dûrê Kobanê û 40 kîlometre dûrê El Bab’î ya. Çehar qezayê Minbic estê. Bi mozaîkê şaran sûkekê bi rengîn a. Mavêna 2011 û 2014î de sûk kewt bin qontrolê Koalîsyonê Neteweyî yê Sûrîye. 2014î ra tepya DAIŞ çeteyanê KNS vet û Minbic girot bin qontrolê xo.
Ronayişê Meclîsê Lejkerî
Serva Operasyonê xelesnayişê Minbic 2ê Nîsan de ser Bendawê Tişrîn de Meclîsê Lejkerî yê Minbic ronîya. Bin banê Meclîsî de quwetanê Şems El Şemal, Sûwar El Minbic (Şoreşgerê Minbic), Îtifaqê Tûgayanê Firat, Tûgayê Cind El Heramên, Tabûrê Şehîdanê Firat û Lîwa El Qewsî ca gênê. Derheqê operasyonî de Meclîsê Lejkerî yê Minbic damûstayîn da. Damûstayîna hetê Fermandarê Meclîsî Ebû Emced’î amê dayen. Ebû Emced’î vist vîrî ke Minbic 22ê Çile 2014î de kewt destê komanê çete, raştê zext, zilm û şîdetî amê.
Ebû Emced’î hayr ant destpa kerdişê operasoyî ser û wina va: “Zey Meclîsê Lejkerî yê Minbic ma raya pêrokîn û şaranê xo ra aşkere kenê ke bin wextê xelesnayişê Minbic bin îşgalê DAIŞ ra ame. Nayî ra ser vengdayişê şarê Minbic û rîsipîyanê ci ma 1ê Hezîran de destpa ‘Operasyonê xelesnayişê Minbic’ kerd. Lejkeranê ma sond wend ke îye dê heta ke pêrokîn hardê sûk bixelesnê operasyon bi qerardarî dewam bikerê.” Ebû Emced’î veng da şaranê Minbic ke qerargeh û meterîsanê çeteyan ra dûr vinderê.
‘Do teslîmê Meclîsê Şaran bibo’
Damûstayîn de cenî, genc û camêrdanê sûk ra wazîya ke dûştê DAIŞ tewrê quwetanê înan bibê û wina vajîya: “Domanê xoverder yê Minbic! Quwetê ma yenê şima bin lepanê DAIŞ ra xelesnenê. Zereyê Meclîsê ma yê Lejkerî de domanê şaranê ereb, kurd, tirmen û çerkezî estê. Hedefê quwetanê ma de kesê ke gonîya şaranê Minbic kewta destanê ci estê.” Damûstayîn de vajîya ke, bado ke sûk çeteyan ra amê xelesnayen, do teslîmê Meclîsê Herema Minbic bibo.
Heta nika çarçoveyê operasyonî de quwetanê Meclîsê Lejkerî 10 ra vêşî kîlometre ray girotî û çend dewî xelesnay.
ANF/KOBANÊ