ERDOGAN ALAYUMAT / MA / RIHA
Çend rojî verê taxa Derto ya qezaya Xelfetî ya Riha de pêrodayîşêk qewimîyabi û netîceyê pêrodayîşî de leşker û polîsan eştbi keyeyan ser, xeylê kesan tepiştbî. Dima ra qasê 2 rojan destûr nêdîya ke ti kes keyeyê xo vejîyo.
Bano ke tede pêrodayîş virazîya, bi temamî bîyo xirabe. Dêsanê banî de herinda guleyan estî û seba ke bombeyê gazî erzîyayî banî mîyan, ban de şewat vejîyayo. Reyna tayê cayanê banî bombayan ver rijîyayo. Yeno vatene ke hedîse ra 4 rojî verê leşkeran taxe de gêrayêne û sehnayîşî viraştêne.
Welatîyo ke nêwaşt nameyê xo bido, melumat da. Welatîyî va ‘verê cu taxe ser o helîkopteran gêrayênê’ û wina dewam kerd: “Dima ra vengê sîleh û bombeyan ame û pêrodayîş dest pêkerd. Leşkeran destûr nêda ma keyeyî ra bivejyî û heqaretê ma kerdêne. Ma 2 rojî binê esaretî de mendî.”
Eke camêrd bibîyêne, do înfaz bikerdêne
Heme endamê keyeyê Alakuşî ameyî tepiştene û banê Zekî Alakuşî ame serûbinkerdene. Banê Fahrî Alakuşî zî serûbin kerdo. Berê banî ameyo morkerdene û kamerayî ronîyayî. Destûr nêdîyeno kes nizdîyê banî bibo û kesê ke fotografê banî ancenî, fotografî yenî pakkerdene. Taxanê Koçhîsar û Dutluca de bi desan kesî ameyî tepiştene û îşkenceyê înan kerdo. Wexto ke polîsî erzenî banê Ruken Denîze ser, verê cu bombeyanê gazî erzenî zere. Doman û extîyarî gazî ra tesîr benî. Endamê keyeyê Denîze dîyar kenî ke polîsî seba înfazî amebî. Polîsan înan ra persê sey ‘Sîlehî kura de yî, şima kura de nimitî? pers kerdî. Endamê keyeyî vanî ‘eke keye de camêrd bibîyêne, teqez do biameyêne înfazkerdene.”