Dewleta Tirk ke dewa Nisêbîn Xerabê Bava de zilm û terorekê gird ramite nika zî şopanê sûcanê xo nimnenê, kenê pak. Welatijan ra S.D. ke bi destûr şi dewe ard ziwan ke ey keyeyê ke veşîyayê, heywanê ke merdîye dî. S.D.’yî da zonayen ke gurekarê pakî boye û badana (şitawe) kerdî. 

Heto bîn ra dewanê Xerabê Bava, Talatê, Cicbilgirav ra dima dewa Qurdisê ke girêdayê qezaya Artûklû ya de zî qedexe îlan bi.

Heywanî merdîye

16 rojan ra dima heta sînoreke destûr ame dayen ke dewa Xerabê Bava rê tayî yardimî bîrê kerdiş. Welatijan ra S.D. yî zî bi destûrê Qereqolê Cendirmeyan heywanan rê simer berz. S.D’yî çîyo ke dewa Xerabê Bava de dî ard ziwan. 

S.D.’yî da zonayen ke raya 15 kîlometreyî de xêlê noqteyê geyrayîşî ronîyayê û dîyar kerd ke dew ra vejyayîş çin o. Goreyê vatenanê S.D.’yî destûr nîno dayen ke heywanî axiran ra bivejîye teber. S.D.’yî çîyo ke bi şahîdê ci zî wina ard ziwan: “Mi ser ray de mange, bizêk û kavirê merdeyî dî. 

‘Mewnê keyeyî’!

S.D.’yî da zonayen ke keyeyê Abdî Aykûtî ke bi îşkence ame binçim girewten û hewadîya nêweşxane veşnîyayo û wexto ke o keyeyê veşnayî weynayo lejkerî ci îqaz kerdo û vato ‘biaçarne vernîya xo, nîyamede’ kerd. S.D.’yî herzewbîn zanayîşê ke dewijan ra girot zî wina ard ziwan: “Dewijan vati ke înan 2-3 rojê ewil vengê tifingan hesnayo. Hona zî keyeyê Behçet Koçhan, Abdullah Zengîn û yê Hasan Bayhan’î zey qereqol yenê şixulnayîş. Keyeyê Alî Gurgun’î zî veşîyayo.” 

S.D.’yî da zonayen ke ser dîwaran de nuşteyê ke amey nusnayen ameyê boyekerdiş. Gurekarê ke şaredarîya Nisêbîn ra şîye karê pakî kenê. Ma nêzanê ke ser dîwaran de çi nusîyayo. 

Aykût berdîya qereqol

No babên de welatijan ra Abdî Aykût ke dewa Xerabê Bava ra bi îşkence girotîya bin çiman û wedarîya nêweşxane, onca peyser berdîya qereqol. Aykût dewa xo de raştê îşkenceyê giran yê lejkeran ame û jû şew zî virankerde ver teberê keye de hewayê serd de ternîya. Resimê îşkencekerdî yê Aykûtî ser çapemenî ra vila bî û kirêşîyay rojdemê meclîsî. 

Abdî Aykût vizêr Nêweşxaneyê Mêrdîn ra sewqê Fermandarîya Cendirmeyan yê Nisêbîn bi. Keynaya Aykût’î Şehrîban Aykût ke  hefteya vernî de bi destûrê dozgerîn şî pêdîyayîşê pîyê xo da zonayen ke pîyê ci bi sebebê îşkenceyê ke dîyo nêzkeno qisey bikero. 

Aykût ke Fermandarîya Cendirmeyan yê Nisêbîn de bin çiman de ame girewtiş, netîceyê hewldayenanê pawitoxan hewadîyabi nêweşxane.   


AYNÛR ÎNEDÎ / SEDAT YILMAZ  / DÎHABER / MÊRDÎN