Vera tayînbîyayîşê qayûman û xespkerdişê şaredarîyan de reaksîyonî her ke şono zêde benî. Sere de Amed, Mêrdîn, Wan û Ewropa de xeylê cayanê bînan de çalakîyî domîyenî. Na çarçewa de xeylê welatanê Ewropa de kurdîstanijan kuçeyan de polîtîkaya hêrişkare ya dewleta Tirkî ya vera Kurdan de şermezar kerde.
Bajaranê Parîs, Marsîlya û Bordeauxî yê Fransa, bajarê Zurîhî yê Swîsre û bajarê Hamburgî yê Almanya de mîtînge, rayîrraşîyayîş û sewbîna aktîvîteyî ameyî viraştene û xeylê kesê beşdarê çalakîyan bîyî. Çalakîyan de pankartê ke ser o ‘Dest mede îradeya mi’, ‘Ma qayûman nêşinasnenî’, ‘Erdogan bivindere’ û sewbîna ameyî akerdene û bi desan dezgehan destek da çalakîyan.
Çalakîyan de siloganê sey ‘Erdogano dîktator’, ‘Kurdîstan do faşîzmî rê bibo mezel’, ‘HDP tena nîyo’, ‘Her ca Amed, her ca xoverdayîş’, ‘Wa bicuyo têkoşînê şorişgêrî yê Kurdan’, ‘Şehîd nêmirenî’ û sewbîna ameyî eştene. Çalakîyan de poster, beyraq û flamayê Rayberê Şarê Kurdî zî ameyî kiriştene. Qiseykerdişê ke ameyî kerdene de bale ancîya xespbîyayîşê şaredarîyanê ke hetê îradeya Kurdan ra ameybî weçînayene ser. Çalakgêran dîyar kerd ke ê do kura de beno wa bibo, faşîzmê AKP û MHPyî teşhîr bikerî. Çalakgêran veng da herkesî ke wa pêro pîya têkoşîn bêro dayene.
ANF / BRUKSEL