Dewleta Tirkan Tirkîya ra mudaxeleyê Ewropa kerdêne û bi bazarîyanê lêminan televîzyonê ke Ewropa de weşan kerdêne padayêne. Bi no qayde kerdêne ke wa raştî nêrê nîşandayîş û zulmo ke kurdistan de beno biramo. Wa kes nêvîno û nêeşnawo. Kurdî bêveng bimanê û wa sey kole biciwîyê. Axirî çend serrîyo ke televîzyonê ke Ewropa de falîyet kenê nênê padayîş. Çend rey ameyê padayîş la reyna bi îmkananê welatperweran ameyî akerdiş. La eke destê dewlete ra bêro televîzyon, keyepel û rojnameyanê muxalîfan pêro-pîya padana. Xususen demê îqtîdarê AKP de halê çapemenî çetîn o. Hema vaje çapamenîya ke AKP rê xizmet nêkena raştê zulmê ci yena û yan teslîm yena girewtiş yan zî yena padayîş. 


Padîyayîşî ra ver cezayê giranî ameyî birnayiş

Seke ma zanê çend serrîyo ke Kurdistanê Vakurî de çend televîzyonê muxalîfî TURKSAT ser o ameybî akerdiş. Mîyanê înan de xususen tesîrê Ozgur Gun TV û ÎMC zaf zêde bi. ÎMC û Ozgur Gun TV bibî veng û rengê pêrune muxalîfan. (Tabî ma tîya de televîzyonê ke ewropa de weşan kenê înkar nêke) Xora ma zanê Televîzyonê ÎMC bi hetê TURKSATÎî ra platformî ra ame vetiş û ÎMC çend aşmîyo ke hotbirt ser o weşan keno. 

La şewa 29ê Tebaxe weşanê Ozgur Gun TV ame birnayîş. Yew vengo kurdewar û televîzyonêko muxalîf ame padayîş. Xora 1 serre û 4 aşmîyo ke çend rey hetê RTUKî ra cezayê pîlî dîyaybî Ozgur Gun TV. Semedê yew xebara Cizîre  21ê Teşrîna Peyêne cezaya pereyan dîyaybî televîzyonî. Onca 5ê Çele de Parlementerê HDP yê Şirnexî Ferhat Encu beşdarê bultenê TV bibi û semedo ke kovîtîya leşkeran ya Silopî ser o zanayîş daybi televîzyon ceza girewtibî û cezaya 10 roj birnayîşê weşanî dîyaybî ci. Polîtîkaya RTUKî bi birnayîşê cezayan bîye û bi no qayde kerdêne ke televîzyonî bitersno û wa muxalîfî ra fek verado. La Ozgur Gun TV nêtersa û gamê xo peyser nêeştî. 


Se ra zêde rojnamegerî hepisxane de yê 

Weşanê Ozgur Gun TV bi nîşandayîşê rastekênan dewam kerd. La demo ke ma ci rê vîyarenê de hukmat bîyo sey harî. Çi keweno verê ci pelixneno û pêrune qewetê dewlete muxalîf û kurdan ser o xebitneno. Nika se ra zêde rojnamegerî hepisxane de yê, xeylê televîzyonî ameyî podayîş, keyepelê ajansan ameyê astengkerdiş. Tewr peynî rojnameyê Ozgur Gundemî ame padayîş, Zana Kaya, Înan Kizilkaya û dostê rojnameyî Asli Erdogane û Necmîye Alpaye erzîyê hepisxane. Onca 23 vilakerdoxê Rojnameyê Azadîya Welat ameyî tepiştiş û hîna zî nezaretxane de yê. Muameleyo ke rojname û çapemenî rê beno heta nika nêameyo vînayîş. 


Raştîye nêmirena la zur û zulum mirenê

Bi qerarnameyanê OHALî bê heq û huqûq her tewir muamele beno. Tabî winasî yew proseso ke AKP bîya sey axtaportî de her çî mumkin o. Eke yew ca de heq, edelet û azadî çin bo uca de her tewir zulum yeno kerdiş. La merdim hem beno xemgîn hem zî beno hêrsin. Dezgeyê çapemenî bi rehetî nênê awankerdiş. Bi zor û zehmetî, bi mucadele yenê awankerdiş. La no axtaporto bêwicdan yew saete,  yew şewe yan zî yew roje de bi hewayo kovane dest roneno her çî ser. La êyê ke no muameleyo antîdemokratîk kenê wa baş bizanê ke peynîya peynî vindî kenê. Çimkî zulum heta cayêk rameno û kesê ke heqdar ê peynîya peynî qelibyayîşê zulumkaran vînenê. Raştîye nêmirena la zur û zulum mirenê û wexto ke mirenê bi zulumkarîya xo yad benê. Aye ra belkî ewro Ozgur Gun TV ameyo padayîş. La rayîrê Ozgur Gun TV rayîrê heqîqetî yo û yew şekil reyna keweno rayîr ser û ver bi azadî rayşîyayîşê xo domneno.      


Xeta heqîqetî yê Ozgur Gun TV

Ma bineyke biewne tarîx û mucadeleyê çapemennîya Azade yê Ozgur Gun TV. Gun TV serra 2002 de bi hewayo herêmî dest bi weşanê xo kerd. La serra bîne, yanê serra 2003 de 1 aşme cezaya padîyayîşî girewte.  Onca yew serre badê yanê serra 2004 reyna 1 aşme cezaya padîyayîşî girewt. Gun TV Tirkîya de reya yewine 23ê Adare serra 2004 de semedê weşanê kurdkî RTUKî rê muracat kerd. La 2 serrî badê cû RTUKî cewab da Gun TV.  Gun TV destûr girewt û 23ê Adare serra 2006 de reya ewilî bi programê "Dergûşa Çandê" dest bi televîzyongerîya kurdkî kerde. Ma eşkenê vaje Tirkîya de sifte weşanê kurdkî bi destê Gun TV ame kerdiş. Tena programî ney, Gun TV de reklamo kurdkî zî ame weşanayîş. Gun TV 22ê Çele serra 2007 de dest bi bultenê kurmancî kerd. Serra 2011 de zî program û bultenê kirmanckî (zazakî) dest pêkerdî. Serra 2009 de çarçewaya operasyonanê KCK de polîsan eşt merkezê televîzyonî ser û Koordînatorê Weşanî yê Gun TV Ahmet Bîrsîn ame tepiştiş û 5 serrî hepisxane de mend. Polîsan dest rona pêrune arşîvê televîzyonî ser. RTUKî serra 2012 de 12ê Êlule de tem 12 rojî bultenê televîzyonî yo kurmanckî qedexe kerd. 14ê Tebaxe de zî fîlmê ‘Pîyanîst’ ver cezaya îqazî dîya Gun TV.


Gun TV ra Ozgur Gun TV

Televîzyonê Ozgur Gun TV  9 serrî ra dima serra 2011 de semedo ke satalayt ser o weşan bikero RTUKî rê muracat kerd. Tem 4 serrî ra pey 1ê Çele serra 2015 de bi nameyê  Ozgur Gun TV ser o TURKSAT ser o weşanê ceribnayîşî kerd. Ozgur Gun TV 6ê Nîsane serra 2015 de dest bi weşanê xo kerd. Vengê xo Kurdistanî ra resna heme cayanê dinya. Ozgur Gun TV semedê şarê kurdî û muxalîfan bibi yew hêvîyêk. La a hêvî şewa 29ê Tebaxe yew derbe werd. Bi zor û zehmetî bi hende emeg û areq… Rasta ci merdim nêzano se vajo. La yew raştî esta. Ozgur Gun TV hetê şarê ma ra zaf amebi heskerdiş. Aye ra tu kes emegê înan û cesaretê înan xo vîr ra nêkeno. Ma hêvî kenê ke demêko nêzdî de Ozgur Gun TV newe ra dest bi weşanê xo keno.



ENWER YILMAZ