Semedê serbestîyê Rayverê şarê Kurd Abdullah Ocalanî hetê  Kongreya Cenîya Serbest KJA kampanyayeke destpa kerd bi. Kampanya ke pê şîara ‘Wahar Rayver, Erd û Serbestîyê xo vecîyena’ organîze bena, bena vila. Edena û Wan ra dima Batman de zî KJA pê yew panelî startê kampanya da. Parlamenterê HDP Ayşe Acar Başaran, Saadet Becerîklî, Hemserokê HDP-DBP ê bajar û qezayan, Dadîyê Haştî û aktîvistê KJA ra pîya xêlê kes tewrê panelî bî.

Parlementer Ayşe Acar Başaran ke panel de qisey kerd eleqe ant rol û muhîmîya Ocalanî ser û va: ‘Weşî û tivarîya Ocalanî xeta ma ya sûr .”


‘Wa heyet şîyero Îmrali’

Başaran hikûmeta AKP îqaz kerd û qalkerdişê xo ûna ramit: “Pê tecrîdî kaos binena beno xorîn û peynîyê nayî zî zaf taloke yo. Coka gerek ca de yew heyetekê bêhet şuyero Îmrali.” Başaran vist vîrî ke serbestîya Rayverê Şarê Kurd Abdullah Ocalanî eynî wexte de, çarekerdişê meselayanê Tirkîye yo. Ayşe Acar Başaran semedê wahar vecîyayîşê kampanya zî veng da şarî û vat: “Pê na kampanya wa şarê ma bajarê ma ke hete dewlet ra rijîyay, newe ra înşa bikerê.” Aktîvîstanê KJA zî day zûnayene ke, ê 12ê aşm de yewna panel virazene, 17ê aşm de şinê Amed tewrê nûmayişa Nobeta Serbestîye benê û 1ê Îlone de zî bajar de yew mîtîngekê gird virazene.


Tecrîd felaket ano 

Teşkîlatê KJA yê Mêrdîn zî bi kombîyayişê çapemenî startê kampanyaya ‘Wahar Rayver, Erd û Serbestîyê xo vecîyena’ da. Azayê KJA ke bana sûk yê DBP de amey têhet hayr antî tecrîdê Ocalanî ser. Hemseroka DBP yê Qoser Bîrgul Yuksel vist vîrî ke sebebê sifteyîn yê kaosê Tirkîye nezdîbîyayişê dewlet yê Ocalanî yo. Yuksel aşkere kerd ke bi tecrîdê Ocalanî ver Tirkîye rayekê sîya amê xîzkerden. Bîrgul Yuksel manîkerdişê pêdiyayinan bi Ocalanî rê nêrazîbîyen damûsna û aşkere kerd ke şertê çarekerdişê demokratîk berzkerdişê tekoşînê serbestîyê Ocalanî yo. Yuksel veng da pêrokîn cenîyanê Tirkîyeyî zî ke paşt bidê na kampanya. 

Yuksel hayr ant newede ra înşakerdişê sûkanê rijnayeyî ser û va: “Serva azadî û newede ra înşa ma emel kenê ke cenî dê her keye, dew, kuçe û sûkî de seferber bibê’. Kombiyayiş bi slogananê “Bê Serok Ciwîyayiş Nêbeno” û tilîlîyan qedîya. 


Swêd de nûmayişî ramenê

Teberê welatî de zî serva serbestîya Ocalanî nûmayişî ramenê. Paywexta Swêd Stokholm de Kurdistanijan bi konvoyê wesayîtan tecrîdî rê nêrazîbîyen damûsnay û waştena serbestîya Rayverê xo berz kerdî. Nûmayişê kurdan yê sûkanê Swêd ramenê. Badê 6 cayan paytext Stokholm de zî meydanan de bî. Kurdistanijê ke bi konvoyê wesayîtan vengê xo berz kerdî tecrîdê Îmrali rê hêrsê xo damûsnay. Nûmayişa ke bi panqarta ‘Ocalanî rê azadî kurdan rê statuyê polîtîk’ navendê sûk de virazîya de hikûmeta AKP amê îqazkerden. Kurdistanijan bi flamayanê resîmanê Ocalanî kuçeyanê sûk de tûr eştî. Nûmayişkaran deyrê kurdî vatî û slogananê ‘Ocalanî rê serbestî’, ‘Biciwe Serok Apo’ berz kerdî.  


 NAVENDÊ XEBERAN