Komployê 9ê Cotmeh Fransa ra heta Almanya, Swêd ra heta Danîmarka xêlê welatanê Awrûpa de bi desan cayan de protesto bi. Sûka Fransa Strasboûrg de bi rayverîna TJK-E de bi hezaran Kurdistanijî û dostê ci roja Şeme amey têlewe, şîyayiş û mitîngeke viraştî. Nûmayişkarê ke Place du Marechal de Lattre de Tassîgny de amey têlewe bi panqartanê “Cenîyê kurd azadîya xo û rayverîya xo wazenê”, “Azadîya Ocalanî azadîya şarê kurd a” heta Place Kelberê ray şî. Herzewbîn sloganê zey “terorîst Erdogan”, “Awrûpa destek dana Erdogan kişeno” berz kerdî.
Şiyayişî ra dima mitîng virazîya. Wekîla HDP yê Wan Tugba Hezer qisey kerd û Komployê 9ê Cotmeh protesto kerd. Hezer vist vîrî ke komplo bi şiklê cîya rameno û va, la ewro şarê kurd wayrê quwetekê girdî yo ke komplo pûç vejo. Hezer hayr ant fikir û felsefeyê Ocalanî ser û vist vîrî ke felsefeyê Ocalanî ewro Rojawa, Bakûrê Kurdistan û Rojhelatê Mîyanî de ciwîyeno û vila beno. Tugba Hezer aşkere kerd ke qonaxa nikayî de kurdan Komployê 9ê Cotmeh veng vetîyo.Serreyê xo çewt nêkenime
Hezer eleqe ant êrişanê hikûmeta AKP yê verra kurdan ser û va: “Rîwalo ke Erdogan ewro kurdan ra terseno, ewqe êrişê kurdan keno. La se beno wa bibo, kurdî serreyê xo çewt nêkenê.” Tewr peynî de Hezer welatanê Awrûpa ra waşt ke destegê xo yê seba Erdoganî bibirnê.
Ser nameyê Hereketê Gencanê Komînîst ê Fransî Maxîme qisey kerd û rîwalê paştîdayişê Erdoganî, verra dewletanê Awrûpa nêrazîbîyen damûsna. Maxîme ard ziwan ke iyê dê tim kişta şarê kurd de hereket bikerê. Tewr peynî de zî ser nameyê TJK-E Fatoş Goksûngûr qisey kerd û komplo lanet kerd. Goksûngûr vist vîrî ke şarê kurd azadîya xo azadîya Ocalanî de vîneno û wina dewam kerd: “Wa her kes rind bizano cenîyê kurd, heta Ocalan azad nêbo, wa kes nêvajo ma azad ê. Heta azadîya Rayverîye bîro ca ma meydanan terk nêkenê. Wa kes ma bi Ocalanî tehdîd nêkero û sebra ma nêpeymo. Seba serbestîya Rayverîye ma berdel da û ma dê hona zî bidê.
Parîs bi hêrsê kurdan lerzîya
Paytexta Fransa Parîs de zî bi hezaran kesê ke vejyay kuçeyan Komployê 9ê Cotmeh rê nêrazîbîyen û hêrsê xo damûsnay. Şîyayişa ke ser vengdayişê CDK-F de virazîya Meydana Republîce de destpa kerd. Kurdê ke bi pankart û slogananê “Ocalanî rê azadî, Kurdistanî rê statu” heta Meydanê Chatlet rayşî destpa mitîng kerdî. Hemserokê CDK-F Vedat Bîngol ke mîtîngî de qisey kerd û behsê Komployê 9ê Cotmeh kerd. Bîngolu aşkere kerd ke heta ke serbestîya Ocalan bi ca nîro dê meydanan terk nêkerê.
Cuyê bê Ocalan qebûl nêkeme
Sûka Almanya Koln de zî bi organîzasyonê YJK-E, bi tewrbîyena hezaran kesan nûmayişê protestokerdişê komployî virazîya. Nûmayişa ke Eberplatz de destpa kerd heta Neûmark dewam kerd. Mitîngo ke Neûmark de destpa kerd de, ser nameyê YJK-E qisey amey kerdiş û vajîya ke komplo şexs dê Ocalanî de pêrokîn şarê kurd de yeno ferzkerdiş.
Sûka bîn yê Almanya Dortmûnd de zî bi nûmayişeke serbestîya Ocalanî wazîya. Rayşîyayişo ke ver îstasyonê tren yê sûk de destpa kerd heta zerreyê sûk dewam kerd. Sûk de zî mtîngeke irazîya. Ser nameyê TJK-E Çîçek Qamişlo qisey kerd û vist vîrî ke ‘Kesayeta Rayverîye de waştî pêrokîn hereket û şarê kurd çinî bikerê. Ma ciwîyayişeke bê Rayverîye qet qebûl nêkenê.’ Sûka Almanya Hannover de zî nûmayişê protestokerdişê komplo virazîya.
Paytexta Swêd Stokholm de zî nûmayişa protestoyî Parka Humlegarden de virazîya. Kurdistanijan bi posterê girdî yê Ocalan û aleyê KCK, PKK, PYD, YPG/YPJ zereyê sûk de geyrîyay. Qiseyan de komplo ra pîya tecrîdo ser Ocalanî zî lanet bi. Nûmayiş bi slogananê “Bicîwe Serok Apo”, “Kiştox Erdogan”, ‘’Kiştox AKP, pîyakar JA’ qedîya. Paytexta Îtalya Roma de zî Kurdistanijî û dostê ci vejyay meydanan û serragêra 18. de Komployê 9ê Cotmeh protesto kerdî.
NAVENDÊ XEBERAN