4 rojî verê Şirnex de ocaxêkê madenî de hezaz virazîyabî û netîceyê ci de 7 karkerî merdbî. Karkeran ra Ugur Kabako 17 serreyî zî birîndar o û tedawîya ey dewam kena.
Babete ser o merdimê karkeran qisey kerdî. Dayîka Abdullah Kayaşî Bedrîya Kayaşe va ‘ez do dejê lajê xo xo vîra nêkera’ û wina dewam kerde: “Nika do 8 domanê lajê mi do se bibî? Lajê mi hîna 17 serreyîya xo de maden de dest bi xebetîyayîşî kerd. Seba domananê xo xebetîyayêne. Çira tedbir nîno girewtiş? No qeder nîyo. Ez nêşêna dejê xo vaja. Do keyeyê bînî se bikerî?”
Seba ke sewbîna kar çinêbî, şîyêne
Cinîya Abdullahî Perîhan Kayaşe zî va ‘lajê min o şenik nêzano pîyê ci merdo’ û wina domnaye: “Mêrdeyê mi xeyalê xo nêdî û şî. Mêrdeyê mi kar gêrayêne, labelê kar çinêbî. Heme domanê mi şîyênê mekteb. Mêrdeyê mi badê ke bi serran xebetîya, nê keyeyî viraşt. Ez do nika se bikera?”
Lajê Abdullahî zî dîyar kerd ke madenî tena pîyê ci nê, xeyalanê înan zî girewt û va ‘ma do keyeyê xo newe ra biviraştênê, no dej do senî derbaz bibo? Eke ez kar nêvîna, mecbûr ez zî do şêra maden de bixebetîya’.
JINNEWS/ŞIRNEX