Wekîlê Hemserokîya HDPyî Îdrîs Balukenî derheqê operasyonê Mûsilî de vist vîrî ke pey operasyonê Mûsilî de xeyalê Neo-Osmanîye esto û eke Tirkîya operasyonî de israr bikero, do ver bi felaketêko pîl şêro.
Artêşa Iraq roja 2. yê operasyonê Musilî de 3 hetan ra destpa galim kerd. Heto bîn ra Artêşa Iraq Başîka de çormeyê cayo ke lejkerê Tirk têde yê girot. Kişta Xazir de roja sifte yê operasyonî ra na het 16 dewî hetê permergeyan amey xelesnayen. Mavêna Hewlêr û Musil de qadeke 200 kîlometre girotîya bin qontrol. Rîwalê operasyonî mavêna hikûmeta Iraq û hikûmeta Tirk de krîz rameno. Rixmê israrê operasyonî de ca girotişê kişta Tirk Iraq peyser gam nêerzena. Wekîlê Hemserokîya HDPyî Îdrîs Baluken ke derheqê israra AKP yê operasyonê Musîlî de qisey kerd, na israr zey xeyalê Neo-Osmanîye hesibna.
Xeyalê Neo-Osmanîye
Wekîlê Hemserokîya HDPyî Îdrîs Balukenî derheqê operasyonê Mûsilî de vist vîrî ke pey operasyonê Mûsilî de xeyalê Neo-Osmanîye esto û eke Tirkîya operasyonî de israr bikero, do ver bi felaketêko pîl şêro.
Hukmatê AKP seba ke sîstemê Serokîye hem MHP û hem zî sewbîna hetan reyde pêvînayîşan keno û reyna heto bîn ra zî wazeno Tirkîya beşdarê operasyonê Mûsilî ke nê 3 rojî yo ke dest pêkerdo, bikero. Wekîlê Hemserokîya HDPyî Îdrîs Balukenî derheqê babetanê sîstemê Serekîye û operasyonê Mûsilî de qisey kerd.
Konseptê 40 serran
Balukenî va hukmatê AKP vera dezgeyanê kurdan yê sîvîlan de operasyonêko topyekun dayo destpêkerdiş û qiseykerdişê xo wina domna: “Nê konseptê neweyî dewamê konseptê 40 serran ê. Problemê kurdî bi zîhnîyetê ‘vera terorî de tekoşîn’ reyde çareser nêbeno û no zîhnîyet problemî hîna giranêr keno. Tirkîya de teşebusê derbe ra dima bi taybetî zî bi qerarnameyê hukmê qanûnî (KHK) zaf îxlalê heqan benî. Konsepto ke hetê Serekomar Erdoganî ra yeno îfadekerdiş, hetê Çîller, Gureş, Agar, Ergenekon û cematê Fetullahî ra zaf reyan ame cerebnayîş la sernêkewt û hetta problemî hîna têman vist. Wexto ke babete bena kurd, elewî, bawerî û şarî her tim ezberê dewlete kewena dewre, heman teda û zilmî yenî nîşandayîş.”
Rayîrê Serokîye
Balukenî derheqê sîstemê Serokîye de zî va ‘Erdoganî şewa 15ê temuze sey lutfêk Homayî (Haq) vîna’ û wina dewam kerd: “Erdoganî verîya coy Ergenekon û cematî reyde îtîfaq viraştbî, nika zî wazeno bi ruhê Yenîkapîye MHP û CHPyî zî bigîro xo hete. Erdogan ruhê Yenîkapiye seba sîstemê Serokîye xebetneno û bi qerarnameyê hukmê qanûnîye zî wazeno hewayo fîîlî sîstemê Tirkîya bibedilno. Vindertişê MHPyî yeno famkerdiş, la CHP ganî fikr û vindetişê xo zelal bikera. Çimkî hem weçînayîşê 7ê Hezîrane û hem zî 1ê Teşrîna Peyên de wexto ke CHP şarî ra reyan waştêne, vatêne ma do vera rejîmê dîktatoryalî têkoşîn bidê. Tirkîya yew cayo ke krîtîk de ca gêna û ya ver bi dîktatorîye şona û yan zî qerarê rejîmêk demokratîk yeno girewtiş.”
Nê polîtîkayî ameyî cerebnayîş û sernêkewnê
Balukenî bal ant ser operasyonê Mûsilî û va: “Binê nê israrkerdişê Erdogan û AKPyî de xeyalê neo-Osmanîye esto. Heta nika zaf reyan nê polîtîkayî ameyî cerebnayîş, la sernêkewtî. Na rey zî do sernêkewo. Operasyonê Mûsilî çi seba Tirkîya û çi zî seba şarê herême ti feydeyê xo çin o. Erdogan û AKP seba ke kurdî projeyê çareserîye de ca nêgî, her tim Sûrîye de xebatanê çareserîye sabote kenî. Bi no hewa wazenî hem kurdan teberê çareserîye de biverdî û hem zî vernîya derbewerdişê DAIŞî bigîrî. Nê zîhnîyetê Erdoganî xeyalê hegemonîk yê Enver Paşayî maneno. Yeno zanayîş ke xeyalperestîya Enver Paşayî bîbî sebebê mergê bi se hezaran ciwananê Anatolyaye.”
ANF / STENBOL