Bajarê Bernî yê Swîsre û bajarê Lavrîo yê Yewnanîstanî de seba vîrardişê Bêrîtane aktîvîteyî ameyî viraştene. Bajarê Bernî yê Swîsre de Meclîsê Cinîyan yê Mizgînî Merkezê Komelê Kurdan yê Demokratîke (DKTM) de aktîvîteyêk organîze kerde.
Virardiş de nameyê Komîsyonê Keyeyan yê Şehîdan, Meclîsê Cinîyan yê Mizgînî û Feda ra qiseykerdişan de muhîmîya rolê Bêrîtane ser o ame vindetene. Aktîvîte bi slogananê ‘Cinî, Cuye, Azadîye’ qedîya.
Bajarê Lavrîo yê Yûnanîstanî de zî bi aktîvîteyêk Bêrîtane ameye vîrardene. Vîrardişo ke Kampa Lavrîo de ame viraştene sendîqakarê Fransizî ke seba paştdayîşê kurdan ameybî ûca, ê zî tewrê ci bîyî. Qalkerdişan de ame vatene ke şarê kurdî şehîdanê xo rê zaf çî deyndar o û ê xeta înan de do mucadele bidî. Aktîvîte bi silogananê ‘Şehîdî nêmirenî’ qedîya.
Lubnan de zî vîrardişî virazîyayî
Paytextê Lubnanî Beyrût de zî vîrardiş ame viraştene. Vîrardiş bi 2 kombîyayîşê ke hetê TEV-DEMî ra bîyî, ame viraştene. Xeylê kesî beşdarê vîrardişî bîyî. Vîrardiş de Îdarekaranê TEV-DEMî ra Şervîn Cudî û Endama Heyetê Îdareyî yê Rêxistina Rîbakî ra Buşra Elîye qisey kerdî. Kombîyayîşan de bale ancîya tecrîdo ke Rayberê Şarê Kurdî Abdullah Ocalanî ser û seba wedarnayîşê tecrîdî veng ame dayene. Kombîyayîşî bi silogananê ‘Şehîd nêmirenî’ qedîyayî.
MERKEZÊ XEBERAN