Medê vergî şino goştê berxik. Wazeno berxik boro. La senin xo rê fetwa veco. Vano berxike ra; to çira awa min leyl (şêlû) kerda? Ti nêvînena ez awa na derî wena. Ka awa leyl yena werî? Berx vana; ku awe leyl biya to leyl kerda. Ti cor de yê, ez cêr de ya. Awe corde yena acêr şina. Ti serniya min de yî. Ez senîn awa to leyl kena. Ti ro min maney kenê. Verg zey xo vano û wazeno zey xo bikero. Ka hema berx nêvaco ma pêro zanê awe cord herekyena ver bi acêrî ra. Biwêja, vanê; ka aw qayme şin a.
Ma zî hewtê Hezîranî de weçînayişêk pêk ard. Bi ser zî kewtî. Heştay wekîlî amey weçînayiş. Meclîs de cayê xo girewt. La sebi se ew cara pey bi! Serekkomar Tayyîb Erdoganî vat nê şima awa min leyl (şêlû) kerd. Nê weçînayişî ez qebûl nêkena. Ma wo raynê newe ra weçînayiş pêk biyarim e. Zey xo kerd. Hema roja weçînayiş diyar nêbiya, vat yewê teşrînî de(1 kasım) do weçînayiş bivirazyo. Qurila weçînayişî ya berz (YSK) zey talîmat girot. Biryar da a roje do weçînayiş virazyo.
Rayna Serekkomar Tayyîb Erdoganî vat Kurdistano Vakûr de ewlehîya sandiqanê weçînayişî çinya. Lazim o sandiqê weçînayişî cayeke de bêrê pêser. Na zî zey talîmatî amew vînayiş.
Ewro Kurdistano Vakûr de zehf cayande qurila weçînayişî yê şaristanîye (İl seçîm kurulu) sere de Cizîre di zehf herêmanê bînan de zey ewlehîya sandiqan çinya qaymeqam û walî çi ca biwazê sandiqan benê ewca. Sebi hewtê Hezîranî de ewlehî bibî nika çinya. Welew raştebo ewlehiye çinay bo ; karê hukimatî ewlehî virazo yo. Hemwelatijanê xo rê rehetî virazo. Ewlehîye destê hukimatî de ya. Gama biwazo saetêke de ewlehîye virazyena. Gama tecritê ko birêz OCALAN î serowo do wedaro. Vînayiş pêk bêro.
Muzakere dest pê bikero. Teyarê şerî û polîsê şerî vinderê ewlehîye tey dir virazyen. Cizîre de new rojî zerê kêye ra teberkewtiş qedexe kerd. Ceyranî birna. Bi hezaran polis û çekê giranan wesaîtê şerî yê bi namê TOMA, kirpî, tanq û helîqopter êrîş berd banan ser. Kuçe û kolanan de ban û dikanî gulebaran kerdî.
Peynî de goniya 21 yew merdiman rişna. Bi hezaran merdimêkê Cizîrî de cuyenê, ka na hovîtî şina yine vîrî ra. Bîy qatîlê şarê cizîrî. Bi no aqil nêşino sere. Raynê lazim o bêro qiseykerdiş. Vatişê verînan a; “Gonî bi gonî nîna şitiş.”
Dîroke de amo vînayiş xirab bi xirabîya xo ameyo şinasnayiş. Xirabîya cê ci rê biya tewqê neletî. Biyo quçê neletî. Başî û qencî biya roşn. Biya şewq, biya rêber merdimayî rê.
Yinê ko gonî rişnawa, zerê gonîya rişnawa te de do bifetesyê. Beso hend rişnayişê na gonî. Bêrê raya muzakerî raya berê demokrasî a kena bi ca biyarê. Rayeke zî a raye bicerebnê.
Nesîp GULTEKÎN