Serokê Civaka Îslamî ya Kurdistan (CÎK) Hafiz Ahmet Tûrhalli ke ANF rê qisey kerd ard ziwan ke, Qurana ke yeno vaten ke aşma Remezanî de ameya ser rîyê erdî, rayîrê însanîyetî dana; heq û neheqî, mezlûm û zaliman pê ra abirneno. Tûrhalli’yî vist vîrî ke, Homa teala vatîyo; na aşmî de ma şima rê Quran şirawit, wa heq û neheqî pê ra bîrê weçînayîş” û wina dewam kerd: “Na jû rayîra raşt mordemîyê rê damûsnena, zerrya mordeman pakî kena. Heq û sînoranê mordeman zelal kena. Verîya Îslamî, xeylê çormeyan ser nameyê Homayî (Heq) nêrindî kerdî. Ewro zî tayî kes û quwetî estê, vanê ke ê Îslamî rê emel kenê, pey Quranî şinê û roje gênê, la nêrindîyan kenê.”
Keyeyê Kurdan rijnenê
Serokê CÎKî Hafiz Ahmet Tûrhalli’yî da zonayen ke tayî quwetî jû hetî ra roje gênê û vejyenê televîzyonan, keyeyê mîletê ma yê fiqare, keyeyê Kurdan ser înan de rijnenê û wina dewam kerd: “Hona taxanê Lalebey û Alîpaşa de keye yenê rijnayîş. Zey Cizîr, Sûr û cayanê bîn xirab kerdî. Ez kesê ke cepheyê serdestan gênê û pîyakarîyê bi înan ra kenê vana: Înan ra dûr bikewê! Biewnîyê, yê ke leyê dewlet de ca gênê, keyeyê way û birayê xo yê Kurd rijnenê. Leyê kesê ke dînî bikaranê de ca megîrê. Eke loqmeyêke to bibo, ayî bi wa û birayanê xo yê fiqare ra pare bike. Çike Kurdistan welişnay, şarê Kurd perîşan kerdî. Ekonomîya pêroyî yê Kurdan xirab kerdî. Ganî Kurdî destê yardimî dergê wa û birayanê xo bikerê.”
Ma fitreyê xo bidê şarê xo
Tûrhalli’yî hayr ant polîtîkayanê lejî yê dewleta tirk ser û vist vîrî, ke aşma Remezanî de zî Kurdistan de operasyonê leşkerî, operasyonê qirkerdişê sîyasî dewam kenê. Serokê CÎKî da zonayen ke bi taybetî dew û dewokê ke operasyon mîyan de virazîyeno de zilm yeno ramiten û wina dewam kerd: “Na aşma bimbarek de vera şarê ma zext û zilm dewam keno. Dewî yenê veng (tol) kerdiş, xoza yena talankerdiş. Lazim o şarê ma nayî bivîno. Ganî verare xo însanê ma yê ke keyeyê înan amey rijnayîş, dewê înan amey veşnayîş akerê û destê xo yê yardimî derg bikerê. Meşirê yardim medê camîyanê tirk û ereban. Hewcedarîyê şarê ma bi yardimî esto. Sûr, Cizîr, Gever ra pîya, xeylê sûkê ma amey rijnayîş. Rojawa xirab kerdî.”
Awrûpa de mîlyoneke Kurdî estê
Serokê CÎKî Hafiz Ahmet Tûrhalli’yî hayr ant rolê Kurdistanijanê ke Awrûpa de ciwîyenê ser û wina va: “Însanê ma yê Awrûpa wa yardim û fitreyanê xo birişê CÎK’î, ya zî mordemê fiqare ke silasnenê ma rê vajê. Ver ke nameyê bîn ê na aşmî rehm o. Ma însnan bîyarê rehmî. Na aşme aşmeke bimbarek a. Ma goreyê na aşme hereket bikerê. Yeno vatene ke Awrûpa de mîlyoneke, mîlyon û nîmeke Kurdî estê. Eke ma sereyê şexsekî 10 Euro fitre bidê, no do bibo 100 mîlyon. Bi nê pereyan ma şenê bibê cewabê hewcedarîyanê însananê xo yê fiqare. No wezîfeyêko xeylê muhîm o. Şertê misilmantî yo."
Tûrhalli’yî peynîyê qiseyanê xo de veng da herkesî ke hemverê dewlet û AKP ya ke zilmê şaran kena, keyeyanê ci rijnena, mordeman kişena û xo ser fitne û fesadî rêxistin kena, bivejyê.
ANF/DORTMÛND