Ma do bar bikerî
Hetkara Serekê Sendîkaya Petrol-İşî Sertîp Ozdemîr derheqê xebatê xorayîrberdişî de ard ziwan ke persgirêkê ke Rojhilato Mîyanên û welatê ma de yenî cuyayîş, heme pergalê navendî û xirabîyîşê pergalê meclîsî ra qewimyeno û wina vat: “Hemverê pergalê yew merdimî pergalê ke bibo alternatîf, pergalê xorayîrberdişî yo. Heremê Rojhilato Mîyanên û Kurdistanî de modelê xorayîrberdişî sero xeylê nîqaşî yenî kerdiş. Semedê ke derheqê no babetî de persê ke sereyê şarî de estî bêrî verpersnayîş, lazim o heremî de bi beşdarbîyîşê cenî, ciwan û sendîkayan sey ‘kursîyê azad’ bêrî viraştiş. Ma sey rayvistişê sîvîl a Êlihî amey têhet û xorayîrberdişî sero xeylê nîqaşî kerdî û do demo ameyoxî de ma raya pêroyîn ra bar bikerî.
Pergal vila beno
Hemserekê HDPe ya Şaristanê Êlihî Abdulbarî Karaagaç zî ciresna ke modelê xorayîrberdişî de taban serkeyî îdare keno û wina verdewam kerd: “Heme pergalan de îdare corî ra, ver bi cêr yeno, labelê xorayîrberdişî de pergal îradeya şarî ra virazyeno. Yanî papoleye ra yeno û heta mehla, şaristan û heme heremî vila beno. No semedî ra merdim eşkeno bivajo pergalekî ke taban serkeyî rayîr beno yo. Semedê ke rewşê netew dewletî tedeyî, pergalê xorayîrberdişî yeno rojdem. Semedê ke pergalê netew dewletî tedaya faşîzan û rayîrberdişê yewperest sey polîtîkaye xo rê esas gêno, xorayîrberdiş do bibo xelasîya şarî. Şar 5 hezar serr verê senî ke xo bi xo rayîr berdênê se, eyro zî eşkeno biko. Cehwerê nêy pergalî de zî demokrasî esto.”
Ganî komînî awan bibî
Sekreterê Malî ya Şaxa SESî yê Êlihî Murat Sezîk zî qalîkerdişê xo de bal ant ser awankerdişê komînan û wina domna: “Wexto ke ma hetê weşî de xorayîrberdiş bigirî dest, aye wext ma veynenî ke Rojhilato Mîyanên de weşî sey bazar yeno vînayîş û bi teknolojîya ke destê xo de tepîşenî zî wazenî şarî bixapênî. Weşî çîyo ke merdim ser menfîeet qezenc biko nîyo. Lazim o her papole, mehla û heremî de komînê ke tede doktor û kesê ke weşî ra eleqeder bibî bêrî resnayîş.”
FERHAT ARSLAN / ANF/ÊLIH