Tay qelemşorî komunîzmî zey dîktatorîya yew partî û yew kesî nişan danî, la ma zanî esil armancê înan çî yo. Zaf hûmarîy de welatê kapîtalîstî de welatijî nêzanî ke komunîzm çî yo.
No bêhişyarî ra zî qelemşorî bi rehetî eşkenî bivajî komunîzm tena bandorî û dîktatorîya yew merdimî yo. Ma persî kapîtalîzm de sinifa şenik senî ser komeleye bandorê xo saz keno. Tirkîyaye de ameyoxê neteweye (pere) seyî ra 70 destê na sinifa berzî de ya.
Seyî ra 30 tena 70 mîlyon kesî ra keweno. Ma pers bikerî; gelo kam totalîter û dîktator o gelo, ya zî duşta komunalist totalîter a? Duşta komunalist de şar xo bi xo îdare keno. Şar zey koleyan qesr û banê gird de nînî xebitnayîş. Pergalo komunist de tewr gird sermaye sey komeleyeka bêhişyar, bêrayvist û vila ameya veradayiş a. Bêhişyar û bêrayvistişbîyîşê komeleye no pergalo mêtinger ra rayîr dano.
Înşakerdişê komeleya sosyalîst
Tay welatê sosyalîstî de şoriş pê ameyo la îrade û komunbîyîşê şarî ra eleqa û muhîmî nêameyo dayiş, no semedî ra zî şoriş tena bandorê yew partî û kes de mendo. Eke rayedarê dewlete ra elaqa bêro mojnayiş se do zey dewletê Çîn, Sovyet, Yugoslavya û Arnavutlukî do xulq bibî, ganî seba înşakerdişê komeleya sosyalîst û mendeya şorişî zaf muhîm o.
Ganî ma zey dewletê sosyalîst, dewleta sosyalîst ra nê, komeleya sosyalîst ra muhîmî bidî. Eke muhîmî nêro dayiş, yew demî ra pey dewleta sosyalîst dijî şarî tê bigêro. Hetta yew demî ra pey zaf hûmarî de dewletê sosyalîst eslê xo ra dûr mendî, bîyê dewleta kapîtalîst. No zî mojneno qet nê dewletan de komele nêbîyo sosyalîst. No ser zî ganîyo ke komunalîzm raşt bêro cuyayiş û bi awayo raşt bêro destgirewtiş. Çimkî cuyayişê tewr weş komunalîzm o. Xorayîrberdiş zî esasê xo de xo bi xo îradekerdiş yanî bîyîşê komunalîzmî yo.
Nê partî nê dewlet
Xorayîrberdiş esasê xo yewîtî û bîyayîşê rayedarîya şaran ra gêno. Xorayîrberdiş de qet nê partî nê dewlet nê zî yew mêrde est o, xorayîrberdiş komunan reyde aver şono. Komunalîzm de kultir, îrade û hêzê şarî vejîyeno meydan. Xorayîrberdiş de şar bi azadîya raşt cuyeno. Pîyasaya serbest de ekonomîya lîberal û dizdeyîya ewroye esto. Noca de demokrasî, edelat û merdimatî çin o. Dinya û Tirkîya hema zî nê duşte de cuyenî. Merdimî zereyê na duşte hêlîyayî û êdî nînî şinasnayiş. Kurdistan de nika cuyayişê komunal fîde dano, no zî rewşeko muhîm o. Ma bawerî ke Kurdistan de her ke şîro komunalîzm hera bibo do heme dîktatorîyê totalîterî birijno û ma zî no rewşî ra zaf bawer kenî.
Komunalîzm Kurdistanî de Têgêrayişê Azad reyde dest pê kerd. Xora kurdan xozaya Kurdistan de hetanê nika her tim awayo komunal cuyayî û no ser zî kurdî komunalîzm ra xerîb nîyî û kurdî eşkenî bi rehetî komunalîzmî aver berî. Kurdî hetanê nika mekanîzmaya tadeye dewlet reyde zaf haşir neşir nêbîyî. Kurdan dîrok de dewlet zî ronayo la kurdî zanî ke cuyayişê bêdewlete hîna bi azad o. (Peynî bî)
Xorayîrberdiş û seba kurdan avantaj o
Bêdewletbîyîş, demo dewletê neteweye de kurdan rê bîyo dezavantaj, la ewro seba kurdan xorayîrberdiş, xopawitiş û komunî hîna bi avantaj î.
Merdim baldar bibo se vîneno ke dorûverî ke hîna zaf dewlete ra muhîmî danî, averşîyîş û xobedilnayişê nê dorûveran hîna bi zehmet o. Seke dewlet nêbo, komele nêeşkena xo aver bera, la no fikir bi aşkera şaş o.
Eke komele xebatake weş bikera do dewlete ra lazimî nêmana. Çimkî dewleta tena sermayeyî ra xizmet kena û seveknayoxî kena. Kapîtalîzm, totalîterîzm û dîktatorî dewlet û komeleye ser bandorîya xo înşa kenî. Eke rijnayîşê totalîterîzm û dîktatorî yeno waştiş se rayîrê ci zî cuyayişê komunalî ra vîyareno.