Xoserî cewherê merdimî ya. Pergalê dewletger ra vêşî merdimî pergalê xoser de cuyayî. Merdimî navendperestî û desthelatî nêşilasnenê. Gor raştîya merdimî, navendperestî û desthelatî rayîr ra vejîyayîş o. A raşt eşîretî, şarî, komelî senî wazenê se ganî winî biciwîyê. Erdê herêm, welat û dina ser de pergalê xo ronê û demokratîk biciwiyê. Kurdî nika naye kenê. Naye de zî çîyêko nêro zanayîş nîno.
Ageyrê ser raya merdimî
Rayverê şarê kurd Ocalan wexto ke vat xoserî; wata naye ê bîn no yo ke vano; ageyrê ser raya merdimî. Wexto ke vano xobîyayîş; wata bîn de vano; ageyrê cewherê merdimî. Seba ke merdimî bi destê dewletan raştîya xo ra zaf ameyê dûr visteni. Naye senî bî, senî raver kewt, ma senî amey na rozan. Xora mêjûyo panc hezar serrî yeno zanayîş. Vejîyayîşê çîn, sermayedarî, desthelatî û dewlet ra nat her ke şino merdimî xo ra dûrî kewenê. Ewro teknolojî raver şîyo, merdimî raver nêşîya. Merdimî peyser şinê. Ez qet bawer nêkena ke merdimîya nika yê verê ra vêşî raver kewte bo. Komara Tirkîya ame ronayene, la hîmê ci raşt nêame awankerdeni. Coka her ke şî şaranê Tirkîya de cuyenê raştîya xo ra dûr amey visteni. Her tim la bi taybet serranê 1950 ra tepîya destê teverî kewt dewleta Tirkîya mîyan.
Dewleta NATO, Amerîka, Îsraîl
Dewlet şekil de yê Tirkaya la cewher de zî yê NATO, Dewletê Jewbîyaye yê Amerîka û Îsraîl bî. Komelêke weşîya ci ca de bo, çi hêzê teverî nêşenê înan rayîrî ra berê. Coka zî hêzên teverî her tim weşîya şaranê Tirkîya xeripna. Naye zî ebi amûrên zek zanîngeh, medya pêrokîn (televîzyon, sînema, nuşteyî) kerde. Derba serra 1980 de ame kerdene, derbeyêde rêze nîya. Derbe ra tepîya komanê komelî nêşa xo destê cengê taybet ra bireynê. Kewtêne damêde winî, seba bireyê lebate kenê xo tadanê la verê ra vêşî noqî awe benê û nika zî şenik mendo ke bêrê xeniknayîş. No babetî de ganî merdim bi taybet roşinvîran ser de vindero. Nika tayn roşinvîr vejîyenê vanê: “Wa dewlet kurdan mekişo, aborîya înan hewl kero, perwerdeyê rindêr bidero înan ke persgirayê kurdan çareser bibo”. Qet nêvanê: “Wa kurd bi xo bêrê pêser, bire (qerar) biderê û senî wazenê se wa winî zî bicuyê. Ganî dewlet û polîs şaristanan mîyan ra vejîyo tenya pawitene pêrokîn bikero”. Nêvanê wa kurd pergalê perwerde, pawiteni, aborî bironê. Wa ciwan û cenîyê înan xo ray fînê, rayvistinan virazê. Jew di îstîsna nê la pêrokîn roşinvîrê sosyalîst, demokrat, oldar, lîberal wina yê. Dewletperestî kenê, vera berjewendîyên şaran de vindenê. Seba nînan baxçeyê dewlete de resayê pê.
Roşinvîrê Tirkîya peyser şinê
Roşnvîrî bi no helwestê xo hêz danê dewlete. Hukimat û burokrasî ra zîyadêrî nê roşnvîrî komel raştîya xo ra dûr vist. Roşnvîr eke waharê vervînîtişî mebo, komel xeripneno. Nika Tirkîya de roşinvîr zemîni weş keno, dewlet zî no zemînî ser de faşîstîya xo rameno. AKP û Erdogan ra vêşî ganî ma roşnvîran rexne bikerê. Roşnvîran şinê rayvistenanê sermayedaran mîyan, mûçe genê, pîzeyê xo masnenê û vejîyenê televîzyonan qisey kenê. Nînan her kesî ra vêşî, komel hetê fikrî û kultirî ra xeripnenê. Reyna tayn roşnvîr estê ke xoser vindenê. Nînan zî xo fikrê kemalîstî ra nêreynayo. Seranserê dina de heme fîlozof, zanayanê waharê fikrê şaristanî vanê ke dewlet û desthilatî rê êndî bes o. Yê Tirkîya zî her çiqas xoser bo zî wazenê sîstemê dewlete hîna vêşî saxlem bibo. Bi no vindertena xo roşinvîrê Tirkîya peyserkî şinê nek verserkî. Xeylê rayvisteni estê nameyê înan stratejîk cigeyrayîş dest ci keno la nê se ra neway û new yê sermayedaran ê. Sermayedar roşinvîran wina weye kenê. Coka zî qandê şaran roşinvîrî se ra jew ya yeno kerdene, ya zî nê.
Dewlet komel cewherî ra xeripna
Mezgê embazan qet wêne gêno. Coka vanê: “Senî beno ke hende çîyan ra dima şarê Tirkîya bêveng û vaj manenê, bertek nîşan nêdanê”. Ma hîna çi bibo ke şaranê Tirkîya vajerê û vajê “êndî bes o” û werzê ser pay, verê faşîzmê dewlet-hukimat-serekkomar bigîrê. La hêvîkerdişê winasî veng o. Des serran o ke dewlet, komel cewherî ra xeripna, kultur ra çinî kerd. Naye rê jew fînak bes o ke merdim bido. Vanê; Tirkîya de se ra 20-25 ê komel paştî dano kiştoxanê bi nameyê îslamê hereket kenê. Ma pêrokînê dina de kamî nêvînayê ke katilî dest nanê ser serê merdiman, porê ci pêt tepişenê, saqêyê xo nanê ser paştîya ci, bi destê rast de kardî serîyan birnenê. Heme şaranê Tirkîya zî naye vînay. La çi heyf! Reyna zî bi mîlyonan merdim Tirkîya de paşt dano nê qetilan. Çi heyf! Ma merdimî hende zî mirena? Komanê komelî, tayn kurdî zî nînan mîyan de, zey merdimê ameyo kung kerde yo.
Xoverdayîş waharvejîyayîş o
Çîyekê bîn o girane zî no yo; kewtena dimê cuya şexsî vindîkerdişê pêrûyî xo ra ano. Ganî rind bêro zanayîş, pêrûkînê dina de qatilan resnenê, anê Kurdistan de danê lejkerdiş. No bername stratejîk o, hera yo, xorîn o. Eke ser kewo kurdistan û Tirkîya ra xeylê qetilan resnenê û pêroyê dina de danê lejkerdiş.
Waharvejîyayîşê ameyoxî
Kapîtalîzm laboratuvar de ceribnena û pêrokîne de zî pratîze kena. Nika laboratuvar Kurdistan o. Eke înan ser kewê no bername sernî de Rojhelato Mîyanên bi pêroyî dina de yeno pratîze kerdeni. Qandê coy xoserî û xobîyayîşê kurdan, xoserî û xobîyayîşê ereb, fars, ermen, asur, tirk û êb o. Dewlemendîya şexsî, felatîya şexsî hêzdayîşê dişmenî yo. Peynî de zî merdiş o. Xoverdayîş, berzkerdişê têkoşîne, waharvejîyayîşê xo û merdimî yo. Waharvejîyayîşê ameyoxê qeçekî û torinî yo.
AZAD ARARAT