Nisêbînijê ke ‘qedexe’ yê dewlet nêsilasnenê, badê mehleyanê Dîcle, Firat, Yenîşehîr û Abdûlkadîrpaşa, xoverdayişê xo vilayê mehleyanê Kişla û Zeynelabîdîn kerdî. Nisêbînijî bi sloganê “Biciw Serok Apo” cewab danê êrişanê qûwetanê dewlet. Herzewbîn welatijî bi nûmayişê veng vetiş êrişanê dewlet protesto kenê.
Kerboran ser pay o
Qezaya Mêrdîn Kerboran de zî ‘qedexe’ yê dewlet roja 12. de yo. Verra êrişan welatijî pey barîqatan de xover danê. Vizêr mehleya Safa de bi seyan kes vejiyay meydanan. Qûwetanê dewlet verniya welatijan girot û ‘qedexe’ yê dewlet vistî vîr. La welatijî vila nêbî û sloganê “Biciw xoverdayişê Kerboran” berz kerdî.
DÎHA/MÊRDÎN
Sûr de ‘qedexe’ yê tewr gird yê komarî rameno
Qezaya Amed Sûr de ‘qedexe’ yê dewlet resya roja 21. ‘Qedexe’ yo ke 2ê aşmî de ame îlan kerdin, zey ‘qedexe’ yê tewr derg yê komar kewt tarix. Rexmo ke dewlet bi tanq û topan êrişê qeza kena, reyna zî nîkewna ser.
Sewqiyatê eskerî ramenê
Bi rojano dewleta tirk bi tanq û topan, bi bombe û tifinganê giran erzena Sûr ser. La rexmê nê hewildayenan qûwetê dewlet nêşay dekewê mehleyan. Heta bîn ra verra mehleyan sewqiyatê eskerî ramenê. Vizêr sodir zî xeylê wesayîtê eskerî sewqê qeza bî. Badê sewqiyetan vengê tifingan û teqînayişan berz bi. Verra mehleyanê Savaş, Karadenîz, Hasirli de êrişê dewlet ramenê. Vizêr zî çeteyanê AKP keyeyan gulevaran kerdî û 4 kes bî dirbetin.
Qeza de bi rojano ceyranê birniyayê. Keyeyê ke roşnî eysenê benê hedefê êrişan. Herzewbîn welatişî nêşenê sobeyanê xo tefînê. Çike wexto ke dûmanî benê berz, çeteyê AKP êrişê nê keyeyan kenê. Welatijê ke çarçoweyê xo pawiten de ver barîqatan de nobed gênê, destûr nêdanê ke qûwetê dewlet dekewê mehleyanê îynan.
DÎHA/AMED