Hukumetê AKP siyasetê lej ê vera kurdan kena xorî. AKP çarçoveyê konseptê herbî û xespkerdişê şaredarîyanê kurd de, na qorî zî Hemşaredaranê Sûka Pîl yê Amedî hedef girot û Hemşaredaranê ci girot bin çiman. Binçimkerdişî ra dima wekîlê HDP, îdarekarê DBP û HDP ra pîya bi hezaran Kurdistanijan destpa xoverdayişî kerd û xêlê sûkan de nûmayişê protestoyî virazîyay.
Hemşaredaranê Sûka Pîl yê Amedî Gultan Kişanak û Firat Anli şewa verî seatanê berey de amey binçim giroten. Kişanak vizêr vengdayişê Komîsyonê Cipersyayişê Hewldayenê derbeya 15ê Tîrmeh ser, şîbî Enqere. Kişanak komîsyonî de qalê rolê AKP ê hewldayenê derbe kerdibi û eleqe antbi hetkarînê AKP û Fetullah Gulen'î ser. Wexto ke Kişanak Enqere ra bi tiyare ageyra Amed, girotiyê binçim. Quwetanê tirk eynî wext de, eşt keyeyê Hemşaredar Firat Anlî ser û ey zî girot binçim. Polîs û eskeran, keyeyanê hemşaredaran ra piya, eşt Şaredarîya Sûka Pîl Pîl zî ser.
Bi keyfê xo hereket kerdî
Quwetanê tirk sereştiş de, kêberê şaredarî kişit û nêvirada qe jew rayver geyrayişî qontrol bikerê. Tenya seba ke geyrayişî rewa damûsnê, destûr da ke 3 pawitoxî bikewê zere. La belê rîwalo ke polîs û lejkeran goreyê keyfê xo hereket kerdî, pawitoxan nêrazîbêyayiş damûsna û peyser ancîyay. Polîsan hetanî seatanê şodir, şaredarîn de geyrayiş ramitî. Şaredarî ra dima zî eşt Dezgehê Aw û Kanalîzasyonî yê Şaredarîn DÎSKÎ ser û wija de zî dest na xeylê kompîtor û belgeyan ser. Binçimgirewtişê Hemşaredaranê Sûka Pîl yê Amedî Kişanak û Anli ra dima, Amed ra pîya xêlê sûkanê Kurdistan û Tirkîye de Kurdistanijî vejyay meydanan û wayrê îradeyê xo vejyay.
Tirkîye kirêşîyena jû felaketî
Bado ke xebera binçimgirewtişê Hemşaredaran vila bî, Amedijan verê xo day ver Şaredarî. Şêligî seatanê şan ra heta sodir ver şaredarî de nobed girot. Rixmê mudaxaleyê polîsan temsîlkarê sîyasî û şar vila nêbi. Quwetanê dewlet bi cop û gazî hêrîşê wekîlanê HDP kerd. Parlementer Feleknas Ûca hêrîş ra bi tesîr bî. Polîsan Endama Heyetê Îmrali Ceylan Bagriyanik erdî ra kaş kerd û girot bin çiman.
Hemseroka HDP Fîgen Yuksekdag zî şî Amed û damûstayîn da. Yuksekdag derbeya binçimgirewtişî zey derbe û sereştişê dûştê îradeyê şarî hesibna. Yuksekdag aşkere kerd ke seba rejîmê serokîn Tirkîye kirêşîyena jû felaketî.
Parlementer Çaglar Demîrel zî aşkere kerd ke heta ke îradeyê înan serbest nîro veradayen nobeda înan do dewam bikero.
Serokwekîlê Koma HDP Îdrîs Balûkenî zî meclîs de kombîyayişê çapemenî viraşt û aşkere kerd ke heta ke operasyonê qirkerdişê sîyasî nêqedîye iyê dê kuçeyan de bê. Balûkenî va, xoverdayiş nika dest keno ci.
‘Sereyê xo çewt nêkeme’
Qezaya Şirnex Cizîr ke bi aşmano bin ablûqa de ya de verra derbeya AKP nêrazîbîyen damûsnîya. Teşkîlatanê DBP, MEYADER, HDP û DBP ke damûstayîna pîyayî day û aşkere kerdî ke bi nê polîtîkayan wazenê bingeyê haştî werte ra wedarnê.
Wan de zî nûmayişê protestoyê Kuçeyê Sanat de virazîya. Parlementerê sûk yê HDP, îdarekarê HDP, DBP û KJA ra pîya bi seyan kes bi slogana ‘Zextî nêşkenê ma bişikînê’ derbeya binçimgirewtişan protesto kerdî. Qiseyan de vajîya ke AKP bi behaneyê ‘hewldayena” derbe hêrişê îradeyê şarê kurd kena û mesajê xoverdayişî amey dayen. Herzewbîn ame vaten ke heta ke Hemşaredarî serbest nêveradîye nûmayişî dê dewam bikerê.
Qezaya Colemerg Gever de zî Parlementer Abdullah Zeydan ra pîya bi seyan welatijî zerreyê sûk de are bî û nêrazîbîyenê xo damûsnay. Zeydanî aşkere kerd ke eke ma na dîktatorî ra milê xo çewt bikerê, ma dê heta se serra bîn bin zextî de bimanê û vengdayişê xoverdayişî day.
Seba protestokerdişê binçimgrewtişê Kişanak û Anli Riha, Edena, Mersîn, Antalya, Îzmîr, Stenbol, Kocaelî, Bûrsa, Enqera û xêlê cayanê bîn de zî bi seyan kesî vejyay meydanan û derbeya AKP rê nêrazîbîyayen damûsnay. Amed ra pîya xêlê cayan de bi desan kesî girotîyay bin çiman.
NAVENDÊ XEBERAN