Çalakîya grevê vêşanî ya Nurîye Gulmene û Semîh Ozakçayî ke seba agêrayîşê karê xo daybî destpêkerdiş, roja 171. de dewam kena. Nurîye û Semîh her di zî Nêweşxaneyê Zîndanê Sîncanî de manenî û her ke şono rewşa înan hîna zaf xirab bena.
Heto bîn ra çalakîya ke Caddeyê Yukselî ya Anqara de seba piştîdayîşê Gulmene û Ozakçayî yena viraştiş zî roja xo ya 291. de dewam kena. Çalakgerî 291 rojî yo ke seba ke bi sloganê ‘ma karê xo tepîya wazenî’ û ‘wa Nurîye û Semîh biagêrî karê xo’ çalakîyan virazenî.
Sey her roje reyna çalakgerî seba ke vernîya Abîdeya Heqê Merdiman de îzehet bidî, Ziqaqê Konurî de ameyî têhet û waştî bimeşyî. Labelê polîsan destûr nêda çalakgeran û bi qalxanan vernîya çalakgeran girewtî. Çalakgeran waştî vernîya qalxananê polîsan de îzehet bidî çapemenîye. Çalakgeran bi slogananê ‘Wa Nazîfe Onaye serbest bêra veradayîş’, ‘Çalakîya Nurîye û Semîhî roja 171. de ya’, ‘Wa Nurîye û Semîh serbest bêrî veradayîş’, ‘Nurîye û Semîh rûmetê ma yî’ û ‘Ma do qezenç bikerî’ eştî.
Polîs mudaxaleyê çalakîye kerdî û heta peynîya Ziqaqê Konurî dayî çalakgeran dima. Çalakgeran tîya de bi sloganê ‘Nurîye û Semîh rûmetê ma yî’ çalakîya xo qedênayî.”
ANF/ANQARA