RONÎ ARAM ANF / STENBOL
Çalakgêranê grevê vêşanîye ra Ûgûr Onûro ke Zîndanê Maltepe de maneno, derheqê prosesê grevê vêşanîye û resayîşê ci yê serkewtişî ser o qisey kerd. Onûrî dîyar kerd ke înan bi bawerîya xoverdayîş resneno serkewtişî hereket kerdo û qismêkê tecrîdî şikna ameyo wedarnayene.
Onûrî bale ante muhîmîya xoverdaşî ser û wina va: “Tecrîd tam nêbo zî qismêkê ci ame wedarnayene. Mucadeleyo ke Rayber Apoyî afernayo, zîndan de ame dayene. Nê prosesî de ma sey kronîk vêşanîye hîs bikerî zî hetê manevîyatî ra ma zaf mirdbî. Ma bi erjanê tarîxî mucadeleyê xo û bi paştdayîşê şarê xo nê demî de xover da û payra mendî. Nê prosesî bi raştîya xoverdayîş timûtûm reseno serkewtişî tarîx de cayê xo girewt. Peynîya mucadeleyî bi azadîya Rayberîye û şorişê Kurdistanî mimkun a. Semedê serkewtişî ganî xoverdayîş bêro xurtkerdene. No zî bi caardişê her vatişê Rayber Apoyî mimkun o.”
Onûrî binpaykerdişê heqan ê zîndanan vist vîrî û wina dewam kerd: “Heme heqê ma yenê binpaykerdene. Dimayê grevê vêşanîye zî semedê weşîya ma gamê cîddî nêameyî eştene. Rejîmo ke nê tecrîdî bica ano zîndanan de zî heme zextan keno. Faşîzm ters o. Xo timûtim serê tersî ra înşa keno. Wazenê ke şarî ser o psîkolojîyê tersî hakim bikerê. Rîyê tersê xo ra çîyê ke bi polîtîkayanê şerî yê taybetî nêeşkenê bica bîyarî wazenê ke bi hêrişan bica bîyarê. Cayo ke dewlete tede esta de ehlaq çîn o. Dimayê çalakîye derbkerdişê tayî embazanê ma nayî ramojneno.”
Têkoşînê ma dejê ma çin kerdêne
Ûgûr Onûrî qiseykerdişê xo bi nê vatişan qedîna: “Wextê grevê vêşanîye de ma de xeylî nêweşîyî vejîyayî. Nêzdîbîyayîşê xebatkaranê weşîye vera ma de bi hawayo hêrişkar bi. Herinda nêrehatîyanê ma werte ra wedarnî de înan waştenê ke îradeyê ma bişiknê. Problemê ma çareser nêkerdêne û waştişê înan o bi ke ma weşîya xo ra qesawet bikerê, bitersê û peyser game bierzê. La seke her kes zî zano vatişê înan semedê ma bêmana bî. Bawerîya ma ya têkoşînî dejê ma çîn kerdêne.”