Koordînasyonê KJK’yî da zanayene ke bi wedartişê tecrîdê serê Ocalanî aşitî û demokrasî yenî Tirkîya û cinîyan ra waşt ke çalakîyanê 8’ê Adare de vera tecrîdî vengê xo berz bikerê.

Koordînasyonê KJK’yî bi wesîleya 8’ê Adare eşkerayîyêka nuştekîye daye û vat bi xoverdayîşê cinîyan do vernîya îqtîdarê faşîstî bêro girewtene. TJA’yî jî derheqê 8’ê Adare Roja Cinîyan ê Kedkaran a Dinya de eşkerayîyêk daye.

Koordînasyonê Komalên Jinên Kurdistan (KJK) da zanayene ke bi wedartişê tecrîdê serê Ocalanî aşitî û demokrasî yenî Tirkîya û cinîyan ra waşt ke çalakîyanê 8’ê Adare de vera tecrîdî vengê xo berz bikerê.

Eşekrayîye ra tayî cayî wina yê:”Rayberîya hemsereka KCD’yî Leyla Guvene de bi desan hemrayanê ma yê cinîyan dormeyê Rayber Apoyî de çember gire dayo û bi sloganê ‘Ma tecrîdî  bişiknê, faşîzmî birijnê, Rayber Apoyî dir azad biciwîyê‘ veng danê  ma hemeyan ke ma xoverdayîş xurt bikerê. Ma nê embazanê xo bi heskerdişî silam kenî û 8’ê Adare roja xoverdayîşî ya înan fîraz kenê. Reyna roja heme dayîkan û cinîyan ê kedkaran fîraz kenê û şehîdanê xo yad kenê.

Cinîyan ê Kurdan bi îdeolojîya azadîye ya ke Rayber Apoyî înan rê kerda dîyarî Vakur, Rojakewtene, Rojawan, Başûr û teberê welatî de organîzekerde mucadeleyê azadîye yê şarê ma rê rayberîye kenî. Cinîyê ke  rîyê nasnameyê xo yê neteweyî û cînsî hetê dewlet-camêrdî ra raştê hêrişî yenê, bi xoverdayîşê biheybetî cawab danê û mîrasê mucadeleyê azadîye gird kenê.

Cinîyan Rojawan û Şengal de vera çeteyanê DAÎŞî bi xoverdayîşê qehremankî şer de rayberîye kerde û kewtê ser. Başûr de zî vera hêrîşan bi ruhê yewîya neteweyîye  vera îşxalî vejîyayî. Rojakewtene de zî cinîyan xoverdayîşê Şîrîn Elamhûlî esas girwet û mucadeleyî gird kenî. Mexmûr û teberê welatî de zî cinîyî semedê pawiştişê nasname, kultur,tarîx û ziwanê xo bêmabên organîzekerde mucadele kenê. Vakurê Kurdistanî de cinîyî yê Kurdan  xora xoverdayîşo tarîxî danê . Ma xoverdayîşê cinîyan ê çar perçeyanê Kurdistan û teberê welatî silam kenê.

Îqtîdaro faşîst wazeno ke bi qirkerdişî ser bikewo

Îqtîdarê faşîstî yê AKP-MHP’yî  wazeno ke vera cinîyan û şarê Kurdî bi polîtîkaya îmhakerdiş û qirkerdişî ser bikewo. Nê semedî ra çar perçeyê Kurdistanî de hêrşê xespkerdiş û îşxalî keno. Êyê ke xover danê erzeno zîndan û îşkence kerdo sey polîtîkaya dewlete. Semedê şiktişê îradeyê şarê ma tecrîdê serê Rayber Apoyî bi xorîkerdişî dano domnayene. Wextê îqtîdarê AKP-MHP’yî de hêriş, tecawûz û tacîzê serê cinîyan zî zêdîyayî û hêrişkar û qetilkarê cinîyan hete dewlete ra ameyê  pawetene. Vera nê rejîmê faşîstî rayberîya cinîyan ê Kurdan de hetanê çep, sosyalîst, femînst, ekolojîst û demokratan ra xoverdayîşêk esto. La heta ke tecrîdê serê Rayber Apoyî mêro wedartene û vera qirkerdişê Kurdan tewiro hempar mêro girewtene vernîya nê faşîzmî nîna girewtene. Ê ke vera faşîzmî yê ganî xoverdayîşo ke hetê Leyla Guvene ra ameyo destpêkerdene, gird bikerê.

Heta ke tecrîdê serê rayber Apoyî bibo cinîyî zî binê tecrîdî de yê

Cinîyan ê Kurdan tim cuya û azadîya xo û ê Rayber Apoyî yew tepişte. Ma her tim vanê ke cuyeya bê Rayber Apoyî ma qebûl nêkenê. Ewro şexsê Rayber Apoyî de heme cinîyî yê Kurdan binê tecrîdî de yê. Rayberîya Leyla Guvene de zîndanan, Kurdistan û Ewropa de bi çalakîyanê girevê vêşanîye xoverdayîşo tarîxî yeno dayene. Ma sey cinîyî yê Kurdî bi xoverdayîşê 8’ê Adare ganî no xoverdayîşê grevê vêşanîye gird bikerê. Na berpirsîyarîya ma ya tarîxî ya. 8’ê Adare de ma ganî bi ruhê yewîya neteweyîye vejîyê meydanan û xoverdayîşî gird bikerê. Bi ruhê Sema Yuce, Rahşan Demîrale û Zekîya Alkanan ganî vera faşîzmî 8’ê Adare û Newroz de xoverdayîş bêro xurtkerdene. Reyna semedê weçînitişanê cayîyan zî bi seferberîye  xebetî bêrî kerdene. Ma veng danê ke heme cinîyî wa bi şîarê ‘Xoverdayîşê cinîyan keno azad‘ 8’ê Adare de vejîyê meydanan.”

Cinî seba azadîye xoverdayîş de yê, grev de yê!

Têgêrayîşê Cinîyan ê Azadan (TJA) zî grevê vêşanîye yê cinîyan ê vera tecrîdî silam kerd û seba tewrbîyayîşê çalakîyanê ke ê bi slogana “Cinî seba azadîye xoverdayîş de yê, cinîyî grev de yê” do bivirazê veng da.

TJA’yî tecrîdê serê Rayberê Şarê Kurdî Abdullah Ocalanî sey tecrîdê serê cimatî name kerd û va:”Nê tecrîdî welat kerdo binê tarîyîye. Grevê vêşanîye yê hemsereka KCD’yî Leyla Guvene yê bêdem û bêagêrayîşî yo ke kewto roja  113’ine, yê Sebahat Tuncele û Selma Irmake kewto roja 45’ine, yê rojnamegere Kîbriye Evrene roja 75’ine de yo. 52 girewteyê cinîyê siyasetmedar û aktîvîstî bedenê xo danê verê vêşanîye û seba azadîya cimatkî cuye de israr kenê. Rayberîya cinîyan de reyna ters û xof o ke cimatî rê ameyo ferzkerdene, yeno şikitene.”

Seba tewrbîyayîşê çalakîyan vengdayîş

TJA’yî peynî de veng bi cinîyan kerd û vat, “Ma veng bi heme cinîyan kenê tilîlîyan û renganê xo vera faşîzmî 8’ê Adare de mîtînganê Amed, Wan û Êlihî de têkoşînî gird bikerê. Vera qeyûmanê îşxalkeran ê ke wazenê destkewtîyanê ma cinîyan çin bikerê, 7’ê Adare Wan de ma do pîya  ‘’Raporê Qeyûm ê Cinîyan‘ eşkera bikerê. Zaf bajaran de ma do kartan hevalnê xo yê zîndanan rê bişawê. Reyna ma veng kenê ke hemê cinî tewrê zîyaret, rayraşîyayîşanê bi şemale, panêl, muzîk, goştarî, pêramotişê resiman, nawnayîşê fîlman bibê.‘‘

 

MERKEZÊ XEBERAN