w Fermandaranê YPJyî ra Axîn Nûcane xoverdayîşê cinîyan û pêroyîya Vakur û Rojhelatê Sûrîye ser o dîyar kerde ke xoverdayîşê înan ameyoxî dîyar keno û wina dewam kerde: “Embazê ma nika Serêkanîyê de vera mergî de huyenê û vanê ‘ma bêxera serkewtişî çîyêk nêfikirîyenê’. Na felsefeya girêdayeyê cuye ya.”
Herçiqas ke bi mabênkarîya Amerîka herême de hesaban ra qerarê adirbirnayîşî ameyo girewtene zî, hêrişê dagîrkerîye yê artêşa Tirkî dewam kenî. Vera hêrişanê dagîrkerî de xoverdayîşê şar û şerwananê QSDyî de dewam keno.
Vera hêrişê ke 9ê Teşrîna verêne ra nata yo dewam kenî de sere de Girê Spî, Serêkanî, Kobanê û cayanê bînan de xoverdayîşêko tarîxî ame nîşandayene û destûr nêdîya ke dewleta Tirkî erdê Vakur û Rojhelatê Sûrîye dagîr bikero.
Fermandaranê YPJyî ra Axîn Nûcane hêrişanê dagîrkeran ê dewleta Tirkî yê vera Vakur û Rojhelatê Sûrîye de sey dagîrkerîya vera şaran de şinase kena û dana zanayene ke 9ê Teşrîna verêne ra nata yo ke hêrişî dewam kenî. Nûcane dîyar kerd ke no qirkerdişêk o û wina va: “Amancê hêrişan dûrîfînayîşê şarê ma yê wareyê xo ra yo û vurnayîşê demografîyaya herême yo.”
No xoverdayîşo dîyin yê Kobanê yo
Nûcanê bale ante xoverdayîşê Rojawanî ser û wina va: “Şervanê ke oxirê azadîye de xover danê û canê xo feda kenê, ma înan xo vîr ra nêkenê û embazanê xo yê birîndaran rê şîfa wazenê. 12 rojî yî ke Serêkanîyê de xoverdayîşêko tarîxî dîyeno. No xoverdayîş, xoverdayîşo dîyin yê Kobanê yo. Ma minetdarê xoverdayoxanê rûmetî yê. Na dagîrkerîya dewleta Tirkî dagîrkerîya vera îradeya şaranê pêroyînan de ya. Çimkî herême de tena Kurd nê, zafê şarê cîyayî estê. Êyê ke vanê ma wayîrê rûmetî yê, ganî vera xo bidê Serêkanîyê. Amancê na dagîrkerîya Tirkî dûrîfinayîşê şaranê wareyê xo ra yo. Qirkerdiş û vurnayîşê demografîya yo. Dagîrkerîya Tirkî şexsê Erdoganî de wazena Împaratorîya Osmanî na herême de newe ra saz bikera. No tena planê Erdoganî nîyo.”
Ma bêxera serkewtişîçîyêk nêfikirîyenê
Nûcane qala xoverdayîşê cinîyan kerde û wina va: “Erdogan senî ma ra vano terorîst? Hêzanê ma şarî reyde vera DAÎŞî de şer kerd. Ewro derheqê ma de tayê qerarî yenî girewtene. Domanê ke Serêkanîyê de şehîd benê, senî terorîst ê? Ma tewirê cinîyan û pêroyê dinya yê ke piştî danê Xoverdayîşê Rûmetî, ci rê silam kenê û ganî vera na dagîrkerîya serê şaran tewirê xurtêr bibê. Seba ke şinasekerdişê xoverdayîş û têkoşînê YPJ û QSDyî asan nîyo. Nika pêroyê şervanê ma wazenê Serêkanîyê de xover bidê, şêrê Serêkanîyê. Xoverdayîş bi şexsê Zîn Kobanê, Nergîze, Ronahî, Nûpelda û sewbîna embazan de bi qerardarî dewam keno. Roja ke şoriş dest pêkerdo ra heta nika hêzê YPJyî bi ruhê rayberîye pêroyê cayan de tewrbîyayîşêko xurt kenê. Embazê ma nika Serêkanîyê de vera mergî de huyenê. Embazê ma vanê ‘ma bêxera serkewtişî çîyêk nêfikirîyenê’. Na felsefeya girêdayeyê cuye ya.”
ANF/BRUKSEL