Nisêbîn nêy rojan de nameyê xo bi xoverdayîşê şarî dano eşnawitiş. Qezayo ke nameyê xo dîrok de sey ‘Serewedaritişê Nisêbînî’ dayo eşnawitiş, wayîrê dejo ke 23 serre verê qewimyayo yo. Çapemenîya hetgir ke aye wext no qetlîamî awayo ‘500 terorîstî hêrişê polîsî kerdî, nînan ra 16 hebî ameyî kiştiş’ nîşan daybî, 22 adare 1992 de piro ke nika sey Pirê Şehîdan de qewimya.Babete ser o şahîdê ke hedîseye ra awayo sax xilasyay, vînayîşê xo ardî ziwan.


Ma bêveng nêmendî

Nure Tekîn ke şahîdê hedîseye ya, ciresna ke aye wext ey dijî qetlîama Cizîrî warîştî lingan ser û wina verdewam kerd: “Ma nêşînaynê dijî qetlîama Cizîrî bêveng bimanî û şanê hedîseyî de vengdayîşê serewedaritişî ame kerdiş. Serê sibay bi hezaran kesî Papola Turano Neweye de kom bî û dest pê meşîyayîşî kerdî. No semedî ra ca de dormeyê ma hetê tanq, top û Polîsê Têgêrayîşê Taybetî ra amey girewtiş. Tanqan ra vengdayîşê ‘Vila bibênê; ger ke şima vila nêbî, ma do şima PKKyij bihesebnî û mudaxale bikî’ kerdî la çew xo tênêda û rayna meşîyayîşê xo ra verdewam kerd.”


Mezgê şarî vila bî

Tekîn dergeyîya qalîkerdişê xo de dîyar kerd ke wexto ke ey resay piro ke nika sey Pirê Şehîdan yeno zanayîş, tanqî înan ser o ramitî û wina domna: “Wexto ke tanqî nêz bî, vatî qey do her kes vila bibo, la çew nêwarîşt. Tanqî merdiman sero vîyartî û vengê şikyayîşê kateyê merdiman hema zî vîra min ra nêşonî. Mezgê merdiman vilayê raşteye bî. Zaf kesî xo eştî mîyanê çemî û çemî de xeniqyay. Domanê min Suleyman zî ma reyde bi, la wexto ke ez ameya ser hişê xo min dîy ke Suleyman zî hetê ma de nêbi. Bade min nêweşxaneya Mêrdînî de ci dî û psîkolojîya ci xira bibi û hîna zî heman awa yo. La şarê Tirkîyaye no nêzanaynê.”


Çem gonî ra sûr bibi 

Şahîd Kader Kurt zî vat ke ay awayo tesadufî xilas bîya û wina vat: “Merdeyan ra gir viraştî û bi paydernayîşê ser birîna înan îşkenceyê înan kerdênê. Cenîyî semedê ke domananê xo bipawî, cuya xo daybî. Yew cenî xo eşt çem, la raştê guleyan amey û çem gonî ra sûr bi. Aye wext hema zî vîra min de yo; cilê cenîyî heme gonî ra sûr bibî. Bade tirmê cenîyî hetê Rojawanî de amey dîyîş. Domanê min zî çokê xo ra birîndar bibi. Aye wextî ra dima cuyayîşê ma zaf bedilya.” 


Çîta waya min weyra de bî

Şahîdê hedîseye ra Cemal Uçar zî ard ziwan ke çapemenî aye wext awayo ‘terorîstî amey çinîkerdiş’ nîşan dayî û wina peynî kerd: “Maya min keye de bî û nêşînaynê bêro, la semedo ke hêz bido ma, çîta xo ya sipî waya min reyde eşrawitbî. Waya min zî weyra de xeriqyay û waya min zî eştî ser girê ke bi tirman viraştî. Waya min çîta ke maya min daybî aye, awayo wişk tepiştbî û veranêdaynê. Heme çî semedê adirê Newrozî bi; ma adirî no hawa vêşî kerd. No semedî ra yo ke ma nika awayo bi bire meşîyayîşî xo domnenî.”  


ZEHRA DOGAN/JINHA