Vera hêrişê dagîrkerîye yê artêşa Tirk û çeteyanê ci de xoverdayîşê şerwananê QSDyî dewam keno. Na çarçewa de tena dewa Mubarekîyê de tewr tay 24 çeteyî kişîyayî û 3 wesayîtî îmha bîyî. Rojnameger Bozo Gundîyî zî xoverdayîşê Rojawanî ser o dîyar kerd ke xoverdayîşî heme cayan de Kurdan resnayo pê.
Hêrişê dagîrkerîye yê artêşa Tirkî û çeteyanê ci 9ê Teşrîna verêne ra nata dewam kenî. Herçiqas ke qerarê adirbirnayîşî ame girewtene zî, artêşa Tirk û çeteyê ci hêrişanê xo domnenî. Xeylê cayanê Serêkanîyê de mabênê çeteyanê dewleta Tirk û şerwananê QSDyî de pêrodayîşî qewimîyenî.
Na çarçewa de vizêr tayê dewanê qezaya Zîrganî yê Serêkanîyê de artêşa Tirk û çeteyanê ci hêrişê şarî kerd. Şerwananê QSDyî cewab da hêrişan û netîceyê pêrodayîşan de tena dewa Mubarekîyê de tewr tay 24 çeteyî kişîyayî, 2 wesayîtê zirxinî ameyî îmhakerdene.
Ame musayene ke dewanê bînan de zî xeylê çeteyî kişîyayî û birîndar bîyî. Reyna dewa Babîl Xerî ya Serêkanîyê de zî tanqêk hetê şerwananê QSDyî ra ame îmhakerdene.
Xoverdayîşî Kurdan resna pê
Rojnameger Bozo Gundîyo ke Hollanda de cuyeno zî xoverdayîşê şaranê Vakur û Rojhelatê Sûrîye ser o qisey kerd û bale ante hêrişê dagîrkerîye yê artêşa Tirk û çeteyanê ci ser. Bozoyî dîyar kerd ke xoverdayîşo ke Vakur û Rojhelatê Sûrîye de yeno nîşandayene, bala herkesî anceno ser faşîzmê Tirkan. Rojnameger Bozoyî da zanayene ke xoverdayîşê şaranê Rojawanî, heme Kurdan dinya de ardo têhet û wina va: “Dewleta Tirkî qasê 5 serran amadekarîyê qetlîyamî kerdî û bi hezaran sîlehî dayî çeteyan. No zî nîşan dano ke waştişê dewleta Tirkî qetlîyam o.”
‘Kurdî çar parçeyan de bîyî yewe’
Gundîyî qiseykerdişê xo de bale ante hêrişanê hovaneyan ê dewleta Tirkî ser û wina va: “Heta ke şer dest pêkerd, QSD goreyê mutabakatê sînorî ke mabênê Amerîka û Tirkîya de amebi viraştene, hereket kerd. QSDyî herême ra sîlehanê xo yê giranan tepîya antî û mewzîyê xo veng kerdî. Herçiqas ke wina bi zî wexto ke şer dest pêkerd xoverdayîşê QSD, YPG û YPJyî ver dewleta Tirkî bêçare mende. Dewleta Tirkî ke nêşêna xoverdayîşî derbaz bikero, dest bi xebetnayîşê sîlehanê kîmyewîyan kerd. Xoverdayîşê Rojawanê Kurdîstanî ver çar parçeyan de Kurdî bîyî yewe.”
Gundîyî qala tewirê dewletanê mîyanneteweyîyan kerde û wina va: “Dewletanê sey Almanya, Hollanda û Îngilistan zî vera hêrişan de tewirê xo nîşan da. Xoverdayîşo ke ame nîşandayene wina kerd ke Amerîka bikewo mabên û adirbirnayîş îlan bikero. Amerîka bi qerarê adirbirnayîşî Tirkîya xelisnaye.”
Ewro Rojawan de Şerê Dinya yo 3. Esto
Gundîyî peynîya qiseykerdişê xo de qala pêvînayîşê ke bi mabêncîtîya Rûsya de mabênê Îdareyo Xoser û rejîmê Sûrîye de bîyî kerde û wina qedêna: “Rûsya dewleta Tirkî vera Kurdan de sey şantajêkî bikar ano. Ganî merdim çîyê ke qewimîyenî goreyê vatişê Rayber Abdullah Ocalanî ke 15 serrî verê vatbi ‘Kurdîstan do bibo merkezê Şerê Dinya yo 3.’ bigiro dest. Çimkî ewro Rojawan de Şerê Dinya yo 3. esto. Kurdî Rojawan de têkoşînê estbîyayîş û çinbîyayîşî danî. Kurdî tena seba xo nê, seba şaranê Rojhelatê Mîyanênî şer kenî.” n ANHA