Ya bi pêameyişî ya zî bi zorî

Nuştoxo lubnanij Anîs Naccach vat ke Erdogan ya bi zorî ya zî bi pêameyişî Surîye ra bêro vetiş. Sîyasemedaro misirij Mamdouh zî dîyar kerd ke Erdogan sînorê xo zaneno, no ser Erdogan ferq keno ke çi bêro sereyê ci.

BERÎVAN ALTAN / MA/ENQERE

Mabenê Tirkîya û Rusyaye de qerqizyayişê Îdlîbî, averşîyayişê Lîbyayî ser o Nuştox û Cigêrayox Anîs Naccach û Berpirsîyarê Têkilîya Teberî ya Partîya Tifaqa Şarê Sosyalîstî ya Misirî Mamdouh Habeshî qise kerdî.

Nuştox û Cigêrayox Anîs Naccach vat ke Emerîqa demêko derg o Rojhelatê Mîyanênî de bi silgirîya rêxistinanê Îslamî de awanîyêk wazena awan bika, Tirkîya goreyê parçeyî yê no projeyî xebat kerd û wina vat: “Tirkîya wazena Rojhelatê Mîyanênî de rejîm bibedilna, bika rejîmêko bi Îslamî. Modelê ci zî Îdlîb, Tunus û Misir bî. Hewnê Neo-Osmanijî wina xirab o ke, teberê Tirkîya çew no hewn nêwazeno. Kewtişê Tirkîyaye yê Lîbya de no hewn esto. Uca de Kurd çin ê, hewnê Osmanî yê Tirkîya mumkin nîyo.”

AKP,  DAIŞijan pawiyeno

Berpirsîyarê Têkilîya Teberî ya Partîya Tifaqa Şarê Sosyalîstî ya Misirî Mamdouh Habeshî zî aşkera kerd ke Îdlîb de Tirkîya rêxistinî ke DAIŞî ra mendî pawiyayiş ser o şer keno, eynî polîtîkayê xo Tirkîya Lîbya de zî aver beno.

Berpirsîyarê Têkilîya Teberî ya Partîya Tifaqa Şarê Sosyalîstî ya Misirî Habeshî wina dewam kerd: “Hukumata AKPî nêçare do Surîye ra biveja, çimkî surîyeyijî seba herra xo şer kenî. Surîyeyijî do hetanî yew lejkerê înan bimano şerê xo yê azade bikê, Rusya na babete ra fam kerd. No ser çew Erdogan ra qet hetkarî nêdano. Erdogan bi israr Surîye de wazeno bimano la Rusya hetkarî nêdana. Erdogan sînorê xo zaneno, no ser Erdogan ferq keno ke çi bêro sereyê ci. Vtişê Erdoganî yê şer, tena fekî ra yo.”