Ewropa de yew hal peyda bîyo. No hal halêk hol û rind nîyo. Seba ke no hal bivîyero gera şarê kurd reyna reyna fikr bikero. Çunke no hal layîqe şarê kurd nîyo.
No hal çîyo? Ge ge Kurdistanê de qîyamet rabibo, şarê ma edetêkî ra fek veranîdano. No edet edetê veyveyo. Dawet kerdişo. Eka(nika) zî eynî edet dewam keno. Vanî par wexto ke dişmenê şarê kurdî dewleta tirk Cizîra Botan de komkiştiş viraştênê, şarê kurd Ewropa de nîmeyê şew de kewtibi kolanan û kuçeyan numayîş kerdênê, tena hîrê(3) veyveyê Cizîrîjan bibi. Raşta raşt nîya ez nîzana la şarê kurd hina qisey keno. Yane bena ke aye ke hîrê veyve de ca girewtinê belkî way, bira, xalza, birarza, êm û apê înan hetê dewleta tirk de amîyenê kiştiş. Vanî zê Ewropa eynî hal Bakurê Kurdistan û Amed de zî bi. Dewleta tirk Sûre Amed û cayê bîn de komkiştiş viraştenê, la hetêk bîn de Ofîs, Rêzan û Peya înan hetan veyve û govend amenê kaykerdiş. Raştîyêk hina bibî. Dewleta tirk merdime înan yew bi yew, qefle bi qefle, ganî ganî kiştênê la înan fek veyve xora veranîdanê. Rojawayê Kurdistanê zî hina yo. Rojawayê Kurdistanê de şerê 3. yê dinya esto. La reyna ca ca yew keyfê xora fek veranîdano. Veyve ser veyveyan kenî, çeteyê DAÎŞ yê dewleta tirk zî şîyê Hesekê de xo mîyanê veyve de teqna bi desan tut, dayî û baw ameyê kiştiş. No hal yeno qebûlkerdiş? Ney.
Wexto ke dişmen ser Kurd û Kurdistan qirkerdiş bikero û vajo, “Ya merdiş û yan zî xelasî (ya îstîklal ya olum!) Gera şarê kurd zî hemberê dişmenê xo hezar vajo “Ya merdiş yan zî xelasî!”
Hetanê ke şarê kurd raştîya şer û qirkerdiş baş famnîkero û goreyê nayî xo amede nîkero, pê veyve û dawet xo bixopîno, halê ma halêk hol nîyo. Cayêk de dagirkerê Kurdistanî dewleta tirk seferberî beyan (îlan) bikero, goreyê nayî xo rêxistinbikero, hêrîşê Kurd û Kurdistan bikero, ma zî keyf û şadî bikerê, wille bîlle û tillehî halê ma halêk baş nîyo. Hina hezar û mîlyon serr şêro ne Kurdistan awanbeno ne zî zulmo ke dagirkerê tirk û dagirkerî bîn kenî xelas nîbeno. Şer de rojdem veyve bibo, yew vajo kam ameyo veyve kam nîameyo veyve, mawitiş hina bo, halê ma halêk perîşano.
Hurendîya nînan de gera şarê kurd vajo, kam hemberê neyarî serê rakeno û kam nîkeno, kam hemberê dagîrkeran şer keno û kam şer nîkeno, kam çalakî keno kam nîşino çalekî bo. Wexto ke hina bibo, kam qey (seba) Kurd û Kurdistan têkoşîn û şer nîkero vejîyeno werte. Kam raştî ra gureyê xo yê kurdbîyayîş ca ano vejîyeno werte. O çaxî kam hemberê dişmenê têkoşîn û şer nîkero, do şerm bikero û dima ra eynî şaşî û xeletî nîkero, têkoşîn û şer de cayê xo bigero.
Yane goreyê kurdan eka(nika) veyve kerdiş zîyadetir, hemberê neyarê Kurdistan têkoşîn, şerkerdiş û xoverdayîşo.