Ewro Rojhilatê Miyanî de ebi name, DAÎŞ, jû rêxistine peyda biya, sarê însanan birnena. Tabî, ver ra kî tarîxê însaniye de sare birnayene est biye. La ez seserra 20îne sero vinden. Seserra 20îne de bi taybetiye dewleta tirkî bi destê xizmetkaranê xo sarê xoverdayoxanê kurdan dayî birnayene. Dewleta tirkî seweta her sarê birnayî haletî dayî qetilkaran. Yanî na dewleta terorîste birnayena sareyan her tim teşvîq kerde.
Hereketê Şêx Seîdî ra tepiya, sarê Heliyê Kurdîstanî Yado ame birnayene. Yado destê quwetanê dewleta tirk ya qetilkare nêkewt. Dardekerdena Şêx Seîd ra tepiya kî koyanê Kurdîstanî de verva dewleta qetilkar Ataturk dapêro. Dewleta faşîste yê CHP o waxt seweta kistena Yado onca halete kerde werte. Gorê vatîsan, peyniye de goneweran sarê Yado birno û teslîmê dewleta tirkî kerdo. Îta de beno zelalke, kulturê herbî yê dewleta tirkî de sare birnayene esta. DAÎŞ na derse dewleta tirkî ra gureta.
Dima, demê Tertelê Dersîm de onca sarê xoverdayoxan ameyî birnayene. Xoverdayîsê Dersîm de dewleta tirkî onca xizmetkarê xo fîştî dewre. Dewlete bi xo verva xoverdayoxan nêşîkiye serkuyo û nêreste xoverdayoxan. Na rîwal ra onca halete kerde werte û xizmetkaranê xo ra sarê xoverdayoxan wastî. Mîlîsanê dewleta qetilkare Dersîm de sarê Alîşer, Zarîfe û yê Sahan Axayî birnayî, berdî Xozat de teslîmê fermandaranê dewleta tirkî kerdî.
Nî 30 serranê peyenan de kî arteşa dewleta tirkî sarê gerîllayan birnenê. Eynî jê azayanê rêxistina DAÎŞ. Eskeranê tirkî sarê û gosê gerîllayan birnenê, payna ci dênê resîm ontenê. Taye eskeranê tirk kî gosê gerîlla birnenê, jê halete mordemanê xo rê rusnenê. Mordem şîkîno vazo, DAÎŞ na derheq de hetê eskeranê tirkî ra amo perverde kerdene. Bingê piyagurenayîsê dewleta tirkî û rêxistina îslamî ya terorîste DAÎŞ na wo.
Dewleta tirkî hata nika şarê kurdî ra seweta nî qetlîaman leborîna xo nêwasta. Nika kî rêxistina DAÎŞ gorê odetê xo yê sare birnayene perverde kerda, verda ra kurdan ser. Hukumatê AKP nimitkî yardim DAÎŞ nêdano, zelal zelal verê çimanê homete de na rêxistinake însanan sarebirnena, yardim dano ci. Naye ra na dewlete de haştiye nêbena. Çike kulturê xo de haştiye çîna, sarebirnayene esta. Na dewleta gonewere her çî ra avê seweta sare birnayena Yado, Alîşer, Zarîfe, Sahan Axayî û gerîllayan gune kurdan ra leborîna xo biwazê. Eke niya nêkerd, kurdî gune vatîsanê AKP yê haştiye rê qeyta îman mekerê. Çike yê na dewleta qilêrine haştiya xo kî qilêrin bena.