AMED DÎCLE / ANF/HEWLÊR
Nasir Yagizo ke seba wedaritişê tecrîdkerdişê Ocalanî grevê vêşanîye de yo, 133 rojî yo xo ver ro dano
Grevê vêşanîye yê bêdem û bêagêrayîşî yê Nasir Yagizî yê vera tecrîdê serê Rayberê Şarê Kurdî Abdullah Ocalanî roja 134’ine de bi persanê giranan ê weşîye dewam keno.
Grevê vêşanîye yê bêdem û biagêrayîşî ê hemwext zî bi gruba 66’ine dewam keno.
Çalakîya grevê vêşanîye yê kampa Şehîd Rustem Cûdîyî ya Mexmûrî yê vera tecrîdê serê Rayberê Şarê Kurdî Abdullah Ocalanî yena viraştene, roja 109’ine de hetê gruba 36’ine ra bi 16 kesan yena dewamkerdene.
Çalakîya Endama Meclîsê Îştarî yê Mexmûrî Fadîle Toke ya bêdem û bêagêrayîşî ya ke 20’ê Çele de amebî destpêkerdene zî roja 74’ine de bi qerardarîye dewam kena.
Xebatkarê weşîye Bapîr Gundikremoyî derheqê rewşa weşîya Fadîle Toke zanayîşî dayî Rojnewsî û vat: “Qerardarî û moralê Fadîle sey roja verî xurt o. Wareyê weşîye de tayê persê ci dewam kenê. Tewr zêde persa tansîyonî esta û seba ke taqet ra kewta sey verî nêeşkena têgêrayîş bikera. Heta nika 13 kîloyî vîndî kerdî.”
Gruba 55’ine dewr girewte
Çalakîya grevê vêşanîye ya ke Komela Karkeran a Mezopotamya ya Silêmanîye de vera tecrîdê serê Rayberê Şarê Kurdî Abdullah Ocalanî yena viraştene roja 110’ine de dewam kena.
Çalakîya biagêrayîşî zî gruba 55’ine dewr girewte.
Çalakîya grevê vêşanîye yê Herêm Mehmûdî kewte roja 39’ine, Şeyma Ednane 32 û Gulebax Celale zî kewte roja 18’ine. Çalakîya Hisên Kerkûkî zî roja 4’ine de ya.